Liverpool tan 'fapa tlanbo' Coutinho
Nipui transfer laiin Barcelona pan duhin Philippe Coutinho-a'n chhuah dilna a thehlut a, mah se an dinna ngaiah Reds ding tlatin an player chhuanvawr hi an chhuah duh lo - Liverpool-in chhuah an phal loh chhan Brazil international hian a pholang a, Leicester City laka 3-2 a an chakna inkhelah freekick hmangin goal ropui a khung.
Premier League champion tum ngam zingah Tottenham Hotspur chuan London derby-ah hnehna an chang bawk a, an mikhualna ramah West Ham chu 3-2 in an hneh. Everton-in league match thum chhung a zawna tlawm hmel an hmuh hnuah hnehna an chang ve ta bawk a, an mikhual Bournemouth chu 2-1 in an hneh.
Coutinho a ropui
Liverpool tana player hmuhnawm ber chu Coutinho a ni a, Barcelona-in pound maktaduai 114-a lakluh an tum player hi 'chhuah dilna' a thehluh avangin huat rawn hlawh hman mah se Reds tan chuan fapa tlanbo kir leh anga parṭhi nena lawm loh rual a ni lo - a thiamzia pholanin a awm tlat.
Tun season-a a league match bul ṭan vawi hnihnaah Brazilian playmaker hian Mohamed Salah khung tur chu minute 15-naah a siam sak a, minute 23-naah free kick hmangin an goal hnihna a khung zui bawk - Foxes keeper Kasper Schmeichel tan dan rual a ni lo. Liverpool tan tun hnaia sawisel hlawh tak Jordan Henderson chuan counter attack chhawr ṭangkaiin an goal thumna a khung ve bawk.
Tlarhnung bawk
Liverpool tan tlarhnung buainain kian lam a pan thei lo. Reds hian 2-0 a hma an hruai laiin Shinji Okazaki chuan an si phurh a sut ṭhen a, Henderson-a'n Reds goal thumna a khung aṭanga minute khat hnu lawkah Jamie Vardy chuan an goal hnihna a khung bawk. Simon Mignolet-a'n Vardy a tih tluk hnuah Foxes-in penalty an hlawh chhuak a, an si phurh an sut ngei dawnin a lang - mahse, English striker Vardy-a hun ṭha neih Mignolet-a'n a dang zui a, Reds an him.
Simon Mignolet-a'n 2013-14 season a Reds a zawm hnuah Premier League penalty 15 a hmachhawn aṭangin vawi sarih a dang thei a, keeper dang zawng aiin a record a ṭha. Liverpool boss Jurgen Klopp chuan, "A ṭha lam hawi zawnga thlir tur tam tak a awm. Point thum kan hlawhchhuah hi mipui hmaah theihna kan neihzia pholanna a ni a, hmalam kan pan zel ang," a ti.
Spurs chakna Kane
Tottenham chak thu sawi chuan Harry Kane-a goal khung thuin a zui zel ṭhin - Inrinni zanah pawh English striker hian goal hnih a khung a, Hammers lakah 3-2 in a team hi hnehna a chanpui. Spurs hian Kane goal hnih leh Christian Eriksen goal khung hmangin 3-0 in hma an hruai hman a, mah se mual neitu West Ham an beidawng lo.
Mexico forward Javier Hernandez chuan minute 65-naah an si phurh a sut ṭhen a, Tottenham wing back Serge Aurier chu a yellow card pahnihna a hmuh avangin minute 70-naah hnawhchhuah a ni bawk. Hammers-in tam zawk an nih chhawr ṭangkaiin Cheikhou Kouyate hmangin minute 87-naah an khung leh zui a, a tawpah Spurs an ṭang tlang hram. Tottenham boss Mauricio Pochettino chuan, "Kan talbuai ngei a, mah se kan bei a ni. Ṭha takin kan khel a, chak zawk nih kha kan phu a ni," a ti.
Everton harhna
Everton khelmualah Bournemouth-in Joshua King goal khung hmangin hma hruai mah se Everton-in a zawna league match li tlawm an duh lo a, 2-1 in hnehna an chang. Merseyside club tan Wayne Rooney thlaktu Oumar Niasse chu danglamna thlentu a ni - kum 27 mi forward hian minute 77 leh 82-naah goal a khung a, a team hnehna a chanpui.
Toffees boss Ronald Koeman chuan, "Vawiina hnehna kan chan hi kan tan a pawimawh a, team pumpui boruak tiṭha theitu tur a ni. Game harsa tak a ni a, chance tam insiam lo mah ila 1-0 a kan tlawm lai khan thutlukna dik kan siam a, striker pahnih kan hmang kha kan vanneih pui ta a ni," a ti. He inkhelah hian Rooney chu Simon Francis chuan thi chhuak khawpin a nghawk a, Francis hrem a ni lo leh penalty a hlawh chhuak lo chu Manchester United captain hlui hi a lungawi lo hle.
Inkhel Results
West Ham United 2 - 3 Tottenham Hotspur
Burnley 0 - 0 Huddersfield Town
Everton 2 - 1 AFC Bournemouth
Manchester City 5 - 0 Crystal Palace
Southampton 0 - 1 Manchester United
Stoke City 0 - 4 Chelsea
Swansea City 1 - 2 Watford
Leicester City 2 - 3 Liverpool