Real tan mi thar Ceballos

Dani Ceballos chuan Real Madrid tana league match bul a ṭan hmasak berah goal hnih a khung - an mikhualna Real Madrid hian 2-1 in Alaves an hneh a, Ronaldo erawhin league match hnih an khelh tawhah goal a la khung lo.

Real-in hnehna an chan zanah Barcelona-in 100% chak chhawm nung turin hnehna an chang ve leh bawk a, khualmualah Girona chu 3-0 in an sawp. Atletico Madrid-in Wanda Metropolitano an hman thiam zia pholangin an khelmual thara vawi hnih an inlannaah a vawi hnih nan hnehna an chang.

Ronaldo aiah Ceballos

Real Madrid-in Ronaldo awm loh hlanin league match liah vawi hnih hnehna changin vawi hnih an khingpui an inhnehtawkpui a, an thiampuipa lo kir hun nghakhlel takin an thlir. Mahse, Real Betis lakah Ronaldo a lo kir a, 1-0 in an tlawm. Alaves lakah pawh Ronaldo ala 'Ronaldo' thei chuang lo a, an mamawh chhanna chu Ceballos a ni.

Kum 21 mi Spanish midfiel­der hian nipui ṭransfer lai khan Real Betis aṭangin Madrid khawpui hi pound maktaduai 15.9-in a zawm a, Alaves a hmachhawn kha league match bul a ṭan hmasak ber a ni - goal hnihin khelh a phu zia a pholang. Ceballos hian a goal hmasa zawk khung turin defender pahnih ven karah a theihna a pholang a, yard 16-a hla aṭangin a khung bawk.

Real an vannei

Real-in an goal hmasa ber an khung hnuah Alaves tan Manu Garcia-a'n an si phurh a sut a, Ceballos-a'n minute thum hnu lawkah a goal hnihna a khung leh avangin Alaves phur lutuk tur a beng dai. Mualneitu team tan Alfonso Pedraza a hlauhawm tluan chhuak zak a, kum 21 mi winger hian vawi khat bar a pet per a, vawi khat dang Keylor Navas chuan ṭha takin a dan sak bawk.

Sergio Ramos chuan goal ruakah a khung lo a, tun sea­son-a La Liga goal la nei lo Ronaldo chuan goal ngei tur nia ngaih aṭangin a khung lo bawk - goal kua khung tawhtu Lionel Messi a phak ta lo hle.

Suarez a inlar ta

Barcelona tan La Liga a harsa lo - league match ruk an khelh tawhah hnehna an la chang fai vek! Barca hian Inrinni zan khan kaithar Girona khelmualah an lenglut a, 3-0 in an haw. Tlarhmaa Messi leh Luis Suarez neitu team hian goal khung tura puih an mamawh loh tehlul nen an goal hmasa pahnih hi chu Girona player-ten an lama an tih luh a ni!

Aday Benitez chuan Jordi Alba shot chu an lamah a ti lut a, goalkeeper Gor­ka Iraizoz chuan Aleix Vidal ball cross chu an lamah a ti lut bawk. Barcelona tan tun hnaia goal khung harsat Luis Suarez chuan a inrintawkna nei let turin an goal thumna a khung a, tun season-ah inelna hrang hrangah match ruk khelin goal hnih a khung - Barca tan La Liga match 100 a khelhna chiah a ni a, goal 87 a khung.

Atletico an kal zel

Atletico Madrid-in table chung lamah Barcelona thlah fal lutuk an duh lo a, an mikhual Sevilla chu 2-0 in an hneh - Atletico hian tun season-ah league match ruk khelin vawi li hnehna an chang a, vawi hnih an khingpui an inhnehtawkpui. An goal hnihte hi Yannick Carrasco leh Antoine Griezmann ten an khung a ni a, January-a squad zawm tur Diego Costa chuan he inkhel hi a hmunah a en.

Madrid khaw club enkawltu Diego Simeone chuan, "Nipui laiin transfer bazar-a che thei lo tura hnung khirh kan ni a, mah se kan harsatna tawh mek hi keini chuan dinchhuah nan kan hmang. Player lalut thei loa kan awmna khan kan neihsa te an ṭhat lehzual theih nana ṭan la turin min pui a, chu chuan team chhungah inelna boruak a siam a ni," tiin a nauten hmasawn an duh avangin team-in an hlawkpui thu a sawi.