Japan-ah Wozniacki a mawi ber

Hmeichhe tennis world number 1 hlui Caroline Wozniacki chuan nimin khan Anastasia Pavlyuchenkova chu 6-0, 7-5 a hnehin a zawnin Pan Pacific Open title a la ta.

Pathianni final inkhelah kum 27 mi Wozniacki hian set hmasa zawkah game a hloh miah loh avangin set hnuhnung zawkah inkhel tawk viau mah se inrintawkna a neih avangin a ding chang, seeded pathumna Wozniacki hian Japan-ah nomawi vawi thum a chawina chiah a ni.

Denmark nula Wozniacki hi kuminah a vannei lo hle, Japan-a final a khelh hma hian inelna hrang hrangah final vawi ruk a khel a, a chak lo zawkah a ṭang vek - final vawi sarih a khelhnaah erawh a chak zawkah a ṭang.

Tennis a khelh hun chhunga nomawi 26 chawi tawh Wozniacki chuan, "Nomawi pakhat chawi turin tha thawh a ngai hnem hle, final vawi ruk ka chak loh hnua hnehna chang ka nih avangin a lawmawm hle a ni," tiin a sawi. Wozniacki hian kum 2008 hnu lamah kumtin WTA tournament pakhatah tal nomawi a la chawi ziah a ni.