A chung berah goal khung thiam Dortmund

Bayern Munich chu Wolfs­burg lakah chak zawh loh laiin Borussia Dortmund-in Borussia Monchengladbach lakah goal ruk an khung a, Peter Bosz-a naute Dortmund hian Bundesliga table-ah point 16 hmuin anmahni hnaih bertu Hoffenheim aiin point hnihin an sang fal tawh zawk.

Zirtawpni zan inkhelah Bayern Munich-in Robert Lewandowski leh Arjen Robben te goal hmangin 2-0 in hma an hruai a, awlsam taka point thum hmu tura ngaih an ni.

Mahse, keeper Manuel Neuer a khelh theih loh vanga lut goal­keeper Sven Ulreich-a'n Maxi Arnold-a freekick pet chu holam taka a chhuah hnuah hun tawp dawnah Daniel Didavi-a ball tauh a dang zo lo bawk, 2-2 niin hun a tawp - Carlo Ancelotti naute hi point khatah an lungawi a ṭul.

Bayern an chelh tih hre lawkin Inrinni zanah Dortmund an inlan a, Bosz-a kaihhruaina hnuaia khel Dortmund hian Borussia Monchengladbach lakah 6-1 zetin hnehna an chang a, striker Pierre-Emerick Aubameyang-a'n hattrick a siam bakah Maximilian Philipp-a'n goal hnih a khung bakah Julian Weigl chuan goal khat a khung ve bawk.

Gabon international Auba­meyang hian season hmasa khan inelna hrang hrangah goal 40 khungin Bundesliga top scorer a ni a, season kal laiah pawh match kua khelin goal 12 a khung leh der tawh.

Dortmund hian an match hmasa pangaah goal chhuah loin an kal thei a, Bundesliga manager ṭang tawh zingah Bosz hi season tir lam match nga chhunga team-te clean sheet neihpui vek thei hmasa ber a ni - Dortmund record duhawm tak hi Monchengladbach forward Lars Stindl-a'n tih tawp sak mah se an mualpho tur a hliah khuh zo lo.

Borussia Dortmund head coach Peter Bosz chuan, "Player ṭhenkhat theihna nei sang bik an awm a, chutihrualin kan chak tluan chhan erawh kan thawhhona ṭhat vang a ni thung. Kan khingpuite kha ball in pe kual hman lek loin kan nawr buai a, ka naute an thawkrimin point thum hlawh chhuah hi an phu a ni," tiin a sawi.

German club lian pahnih hian Champions League-ah match hautak an khel zui dawn. Bayern Munich hian Nilaini zanah Ligue 1 club Paris Saint-Germain an lenchilh dawn a, Dortmund hian nomawi kawltu Real Madrid an mikhual bawk ang.

Inkhel Results
Bayern Munich 2 - 2 Wolfsburg
RB Leipzig 2 - 1 Eintracht Frankfurt
Hoffenheim 2 - 0 Schalke
Werder Bremen 0 - 0 Freiburg
Mainz 1 - 0 Hertha BSC
Stuttgart 0 - 0 Augsburg
Borussia Dortmund 6 - 1 Borussia Monchengladbach