Kolkata khawpui mawitu Mizo tlangval Brandon, Chullova & Danmawia
Calcutta Football League champion chu East Bengal an ni - Pathianni khan Mizo pathum Brandon VL Remdika, Lalramchullova leh R. Laldanmawia te khelhna East Bengal hian Kolkata derby-ah Mohun Bagan chu 2-2 in an inhnehtawkpui a, season riat chhung a zawna CFL champion an nihna a ni.
Kolkata Derby-a hming langsar ber chu Mizo tlangval R. Laldanmawia a ni a, Sialhawk Express tia hminglem an pek winger hian an si phurh sutna goal a khung bakah penalty a hlawh chhuak bawk - man of the match atan thlan niin a team a champion pui.
AFC reunion!
East Bengal-in season hmasa I League zawh rualin ropui taka Aizawl FC champion puitu Khalid Jamil an lalut a, Mumbai coach hian AFC lama a hman thiam sa Mahmoud Al Amna, Brandon, Chullova leh Danmawia a hruai tel bawk. Khalid a hnuaiah Mizo club player hluiten hmun pawimawh an chang phak vek a, CFL nomawi an chawina kawngah an thawhhlawk hle.
Mohun Bagan an danglam tam bik lo - I League-a Aizawl FC hnathawh ropui hmuin club top scorer Kamo Stephane Bayi leh tlarhnung ban rinawm Eze Kingsley an lalut a, Aizawl FC captain hlui Ricky Lallawmawma an lalut tel bawk.
Danglamna chu
Pathiannia Siliguri khawpuia Kolkata derby khelh a nih hmain club pahnih point hmuh zat a in ang a, goal difference-a dinhmun ṭha zawk East Bengal tan champion nomawi chawi turin draw result hlawhchhuah a tawk. Mahse, minute thumna lekah East Bengal player Carlyle Mitchell chuan an lamah a ti lut a, Bagan dinhmun a ṭha.
Minute 44-naah Danmawia a inlar a, Sialhawk Express hian Gabriel Fernandes freekick aṭanga Chullova ball siamsak chu goal-ah a chantir. Second half ṭan aṭanga minute lina lekah Bagan-in penalty an hlawh chhuak a, Ansumana Kromah chuan goal-ah a chantir. Mahse, East Bengal-in Mizo tlangval Danmawia an nei a, minute 66-naah penalty hlawh chhuakin Al Amna chuan goal-ah a chantir.
Vanglaini Biangbiakna
Laldanmawia'n league match riat an khelhah inkhel bul a ṭan vek a, goal thum a khung. Sialhawk Express chuan, "Champion kan inbeisei a, mah se league tawp lamah kha chuan boruak a san avangin zam a awl hle. Khalid Jamil-a'n ka chungah rinna a nghat ngam a, nomawi kan chawi thei hi ka hlim takzet a ni," a ti a, "Kolkata derby meuha goal khung chu danglam tak a ni," tiin a sawi bawk.
Chullova chuan, "CFL-a kan vawi khat khelhna a ni a, East Bengal tana khelh chuan pressure a sang bawk nen kan champion ta hi ka lawm takzet. Khaldi-a'n Mizo player-te min duhsak vek a, duhsakna dawng turin kan thawkrim em em bawk," tiin hmun pawimawh chang tura an thawhrim thu a sawi - Armed Veng tlangval hian match khat chiah khel loin match sarihah inkhel bul a ṭan vek a, assist vawi li a nei.
Hunthar tlangval Brandon chuan, "Thil thar vek a nih avangin rinlawk dan pawh nei thiam loin CFL kan hmachhawn a, kan champion thei ta hi kan hlim takzet. Coach-in kan chungah rinna a nghat ngam a, chu chuan minti phur lehzual a ni," a ti. Brandon hian league match rukah inkhel bul ṭanin goal hnih a khung a, Kolkata derby-ah hian second half-ah luthir a ni.