Spartak khelmualah Reds

Liverpool chuan zanin dar 12:15-ah Champions League group stage match khel turin Russia an pan dawn a, Spartak Moscow an hmachhawn ang - Russia hi mikhual team tana chak harsatna hmun nia sawi ṭhin a nih avangin Liverpool tan tum ang ngawtin a awlsam lo ang.

Group E inkhel dangah Sevilla chuan zanin dar 12:15-ah vek Maribor an mikhual dawn bawk - Group E-ah vawi khat ṭheuh inlan tawhah hnehna chang an la awm lo a, point khat ṭheuh hmuin an la intluk tlang - Reds tan last 16 lut turin Spartak Moscow khelmualah chak a pawimawh dawn.

Spartak an buai

Russian champion Spartak-in tun season-ah beisei an phak lo. Inelna hrang hrangah match 14 khel tawhin vawi thum an tlawm a, vawi ruk an khingpui inhnehtawkpuiin vawi khat chiah hnehna an la chang - he boruak karah hian club president Leonid Fedun chuan Reds an hmachhawn tur bak hi manager Massimo Carrera chungah rinna nghah a tum tawh lo nia sawi a ni a, thih tha nen Russian club hian Reds an lo mikhual dawn tihna a ni.

Hetihlai hian Spartak dam­dawi in a lun a, Liverpool tan thu hriat nuam a ni - tun dinhmunah Gremio aṭanga an lakluh thar Pedro Rocha, attacking midfielder Jano Ananidze leh tlarhmaa an innghahna Quincy Promes te chu an inlan theih a rinawm loh a, an player pawimawh pathum tel loa Reds mikhual hi an duh dan a ni bik hauh lo ang.

Tlarhnung buaina

Russia khaw vawt hnuaiah Liverpool tlarhnung an ding khawng zo ang em? tih chu zawhna awm a ni a, chhanna pe theitu chu Reds player-te chauh an ni. Merseyside club hian tun season-ah inelna hrang hrangah match 10 khel tawhin vawi hnih chiah goal chhuah loh an nei a, khualmuala an match khelh pangaah goal chhuah loh an nei miah lo. Khualmuala Reds goal chhuah zat hi 13 a tling a, chumi awmzia chu khualmuala an inlan apiangin goal 2.6 zel chhuah ang an ni.

Reds boss Jurgen Klopp pawhin a tlarhnung pawp chu pha buai duh loin, "Goal kan chhuah hnem tih hi zep rual a ni lo a, chu chu ka tan pawh siamṭhat a hautak hle. Defensive coach ṭha tak ka ni ṭhin a, tun hnaia kan khelh danah erawh chu chu hmuh turin a awm lo. Mahse, rinna nghet tak ka nei a, tlarhma mai ni lo tlarhnung thlengin an chungah rinna ka nghat. He team inkhel hi hmuh nuam ka ti a, hma kan sawn zel pawh ka beisei a ni," a ti a, Russia-ah tlarhnung phui zawk hmuh a inbeisei.

Sulhnu
• Spartak Moscow-in an khelmuala Champions League match an khelh hnuhnung 17-ah vawi hnih chiah hnehna an la chang a, vawi 10 a tlawm zawkah ṭangin vawi nga an khingpui an inhnehtawkpui.
• Spartak Moscow-in Champions League knockout stage vawi khat chian an la inpet thleng a, 1995-96 khan quarterfinal an khel.
• Liverpool-in Champions League-a an match hnuhnung parukah chak hmel an hmu lo a, vawi thum an khingpui inhnehtawkpuiin vawi thum an tlawm - he inelnaa chak hmel an hmuh loh rei ber ṭum an tawng mek.
• Liverpool-in Champions League-a match an khelh hnuhnung pariatah goal an chhuah vek.
• Reds-in Sevilla an mikhual khan vawi 17 ngawtin shot an nei team zawk a, tun season-ah shot heti zata inthlau chunga chak zawk awm lohna Champions League match awmchhun a la ni rih.
• Club pahnih hi vawi li an intawng tawh a, vawi hnih ve ve hnehna an chang.