AFC Cup khel tur India Under 16

Mizo pali telna India Under 16 chu AFC Under 16 Championship 2018 khel turin an inpet tling a, nakkuma Malaysia-a Asia khawmualpui rawlthar thiam rual inelnaah an inlan dawn.

AFC U16 qualifier Group D-in Nepal-a inelna an neihah India hian pahnihna dinhmun an luah - Palestine chu 3-0 a an sawp hnuah Nepal leh champion lai Iraq an inhnehtawkpui a, pahnihna zinga ti ṭha pangaah an tel phak avangin AFC U16 inelna hi an khel dawn ta a ni.

AFC U16 qualifier-ah hian ram 47 chu Group A - J ah ṭhen hran an ni a, team 16 tling tur zingah inelna thlengtu Malaysia, Jordan, Tajikistan, Iran, Iraq, Yemen, North Korea, Indonesia, Australia, Japan, Oman, India, Thailand leh Vietnam te chu tling tawh an ni a, Group H champion leh runners up zinga ti ṭha pakhatin an la zawm leh ang.

Mizo pali Lalrokima, Lal­biakhlua Jongte, Lalchhanhima Sailo leh Eric Remruatpuia Chhangte te chu Nepal-ah hian India aiawhin an inlan.