Dortmund khelmualah Real Madrid lut dawn

Champions League nomawi kawltu Real Madrid chu zanin dar 12:15 hian Borussia Dort­mund khelmualah an lenglut dawn. Spanish club hi tun hmain Signal Iduna Park-ah vawi ruk an lenglut tawh a, chak ni hmel an la hmu miah lo. Zinedine Zidane leh Cristiano Ronaldo te tan hna a awlsam dawn lo tih a rin theih - inkhel hi Sony Ten 2-ah live a ni ang.

Bundesliga club leh La Liga club liante hi season hmasa pawh khan group khatah an awm ho a, Ger­many-a an inkhelh ṭumin Real hian Ronaldo leh Raphael Varane te hmangin hma hruai mah se Pierre-Emerick Aubameyang leh Andre Schurrle ten sutin 2-2 in an inhnehtawk, ṭum thum an inhnehtawkna niin vawi thum dang chu Dortmund lamin hnehna an chang.

Danglamna Bosz

Thomas Tuchel thlaktu manager Peter Bosz-a'n beisei aia ṭhain Dortmund chu season bul a ṭan pui. Dutch ma­nager kaihhruaina hnuaiah Dort­mund hian Bundesliga match ruk an khelh­ah vawi nga hnehna an chang a, ṭum khat an khingpui an draw; goal khat bak an la chhuah lo - European league lian panga zinga season bul ṭan ṭha ber an ni mek.

Bundesliga hmahruaitu hian league lama an chet ṭhat viau laiin Champions League lamah erawh an match hmasa berah Tottenham 3-1 in an ngam lo. Spurs an hneh ṭum pawh hian inkhel an thunun hneh hle a, ball possession pawh 70% chuang an nei. Ball chang tam mah se an tlarhnung phui lo an tuar.

Kum 53 mi Bosz-a'n Premier League club laka an chetsual ṭum hian an insiamṭhat nghal tur thu a sawi. Group H-ah hian Real Madrid, Spurs leh Dortmund te chu knockout stage luh inchuh tur an ni a, German club tan chetsual nawn a thiang tawh lo. Season hmaa Champions League match kua khelh aṭanga goal sarih khung thei Aubameyang chu Dortmund tlarhma lama innghahna a ni leh ang.

Gabon international Auba­me­yang hian Inrinni zana Borussia Mon­chengladbach 6-1 a an sawp ṭumin hattrick a siam, Real tlarhnung tan ven ngun a ngai khawp ang. Dortmund hian nipui lai khan Max Philipp, Andriy Yarmolenko, Mahmoud Dahoud leh Omer Toprak te an lalut a, heng player palite hian hmun pawimawh an chang chho der tawh.

Kum 23 mi forward Philipp-a'n a club thar tan goal li a khung bakah assists vawi thum a nei tawh. Dortmund hian hliam vangin an player pawimawh Marco Reus leh Andre Schurrle te bakah Raphael Gurreiro, Erik Durm, Sebastian Rode leh Marcel Schmelzer te chhawr thei lo rih mah se player thar an hman thiam tawh avangin an buai lo tura ngaih a ni.

Hmasawn ngai Real

Champions League leh La Liga no­mawi nei kawp chungin Zidane-a nauten season bul an ṭan a, kar tawpa Alaves an hneh thleng kha chuan season hmasa lama kan hmuh Real Madrid ang kha an la ni lo, an tlarhnung a phui loh bakah hmatawng an hriam tawk lo bawk.

Real Madrid hian La Liga bikah an elpui Barcelona chu point sarihin an phak tawh lo a, an dinhmun a ṭha rih lo hle. Alaves an hneh ṭuma goal hnih khungtu chu nipui laia an lakluh Dani Ceballos a ni. Kum 21 mi Ceballos hian Real tana league match inkhel bul a ṭanna hmasa berah point thum a hlawhchhuah sak nghal.

Real manager Zidane chuan, "Kan tan hun ṭha tia sawi tur a ni lo, hun harsa hi kan paltlang ngei tur a ni," tiin Alaves an hneh hnuah a sawi a, French manager hian insiamṭhat an mamawh zia a hai lo a, zanina an hmachhawn tur Dortmund lakah hian a ralthuam neih ṭha ber a thawhchhuah pui ngei ang.

Hrem vangin Ronaldo-a'n match a la khel tam lo, Portugal captain a rawn kirna inkhelah Real Betis lakah si khat faiin an tlawm a, Alaves lakah Ronaldo a nil leh bawk - kum 32 mi Ronaldo hian dinhmun khirhkhan a ding mek Real tan a theihna a lantir a hun leh tawh.

Ronaldo hian Champions League-ah match 141 a khelh aṭanga goal 107 khungin record nei ṭha ber a ni a, Manchester United forward hlui hian Real a pan hnuah match 89 aṭangin goal 92 a khung thei a ni.