Laver Cup champion Team Europe

Mipa tennis team hmanga inelna Laver Cup chu a vawi khat nan Czech Republic khawpui Prague-ah neih a ni a, Team Europe chuan Team World 15-9 a hnehin nomawi an chawi.

Grand Slam vawi 11 champion Rod Laver hming chawia siam Rod Laver-ah hian team pahnih an inel, Europe-a player ṭha thlan chhuah leh khawmual dang zawng zawnga player ṭha thlan chhuah te chu singles leh doubles match thum ve ve hmangin an inel.

Inelna hi ni thum chhung neih a ni a, ni hmasa berah hnehna changin point khat an hmu a, ni hnihnaa chak chuan point hnih hmuin ni hnuhnung bera chakte chuan point thum zel an hmu thung.

Inrinni zan khan Team Europe lamah hian Roger Federer leh Rafael Nadal te chu doubles-ah ṭangdunin Sam Querrey leh Jack Sock te ṭangdun chu 6-4, 1-6, 10-5 in an hneh. Pathianni zan khan singles mtach-ah Nadal chu John Isner lakah chak lo mah se Federer hian Nick Kyrgios hnehin nomawi a chawi pui a ni.

Kum 36 mi Federer chuan, "Chawlhkar nuam leh hlimawm tak kan hmang a, sulhnu ṭha kan hnutchhiah bawk. Laver Cup hi engtiang taka ropui nge a ni tih chu hunin a la hril dawn a ni," tiin a sawi.