Australia ngamtu India invawrhsang

India chuan ODI series an khelh mekah a vawi thum nan Australia chu wicket ngain an hneh a, match hnih khelh tur la hmabak mah se 3-0 in series an la fel - Sri Lanka laka series la tawh India hi ODI ranking-ah a chung berah an invawrh chho nghal.

Indore khawpuia inkhelah Australia an bat hmasa zawk a, over 50-ah run 293 siamin wicket ruk an hloh - Aaron Finch chuan ball 125 a hmachhawnah run 124 a vaw chhuak bawk a, Australia hi dinhmun himah an dungah ngaih a ni.

Mahse, mahni muala khel India-in harsatna an nei lo - opener pahnih Ajinkya Rahane (70) leh Rohit Sharma (71) ten run 139 ngawt an rawn vaw chhuak nghal a, run 78 vaw chhuaktu Hardik Pandya chuan a pui ṭha hle bawk - ball 13 hmachhawn tur a la awm tihin India-in an target an umpha a, wicket nga chiah hloh chungin hnehna an chang.

India hian Test leh ODI ranking-ah pakhatna dinhmun an luah ta ve ve a, ODI-a an match hnuhnung pakuaah hnehna la chang vekin an record neih ṭhat ber an nihrual. India leh Australia hian September 28-ah an match lina an khel leh ang.