Padma Bhushan Dawng thei zingah Sindhu

India civil mite chawi­mawina sang pathumna Padma Bhushan dawn thei tur zingah PV Sindhu a tel. Thawhṭanni khan Sports Ministry chuan Sin­dhu hi an nominate a ni.

Kum 22 mi Sindhu hian nikum Rio Olympic-ah khan badminton inelna huangah silver medal a vaw chhuak a, India player zingah hetiang dinhmuna ding thei hmasa ber hi a ni.

Sindhu chuan, "Padma Bhushan dawng thei tura sawi zingah ka tel hi ka lawm a, sorkar bakah a bik takin sports ministry chungah lawmthu ka sawi a ni," tiin a sawi.

Hyderabad nula hian kumin chhungin Syed Modi International, Indian Open leh Korean Open nomawi a chawi bakah World Championship-ah khan silver medal a la bawk - tunah hian world number 2 dinhmun a chelh mek. Sindhu hian kum 2015 March thla khan Padma Shri award a lo dawng tawh bawk.