Inter chak laiin Milan an tlawm

Pathianni zan Serie A inkhelah Inter Milan chuan an mikhual Genoa chu 1-0 in an hneh a, Luciano Spalletti nauten point thum an hmuh lai hian AC Milan erawh Sampdoria lakah 2-0 in an tlawm thung.

San Siro-a inkhelah Inter tan minute 87-naah Danilo D'Ambrosio chuan chakna goal a tauh lut chauh. Hun tawp dawnah Stephane Omeonga leh Adel Taarabt te chu hnawh­chhuah an ni a, goal dang luh nan hun dang a awm tawh chuang lo thung.

Inter manager Spalletti chuan, "Ka nauten khelmual chhungah an theihtawp an chhuah a nih chuan hnehna kan chan ngei kha ka beisei tlat a ni. Fans kan nei ṭha a, hun tawp dawn thleng khan beidawng loin kan tan an awrawl an chhuah a ni," tiin a sawi.

Inter hian Serie A match ruk khelhah point 16 hmuin league table-ah pathumna an ni a, an chungah hian point 18 hmu thei Juventus leh Napoli te an awm mek.

Inkhel dangah nipui bazara che na tak AC Milan tlarhnung a buai lo. Sampdoria tan Duvan Zapata leh Ricky Alvarez ten second half-ah goal khungin Milan lam hian a chhan letna tur an nei lo.

Milan coach Vincenzo Montella chuan, "Player mal khelṭha sawi tur an awm lo hial. Inkhel chawhma lamah khan hun ṭha kan insiam hnem hle a, mahse kan rilru huaisen tawk loh vangin kan khung thei lo. Taksa bakah rilru lamah hmasawn kan ngai hle," tiin a sawi.

Pound maktaduai 175 senga player 10 chuang laluttu Milan hian point 12 an hmu tawh a, pa­rukna niin hmahruaitu Napoli an phak lohna chu point ruk a ni der tawh.

Italy international Ciro Im­mobile-a goal hnih hmangin Lazio chuan Verona 3-0 in an hneh a, table mawngphah lama tal­buai mek pahnih inkhelah Crotone chuan Benevento 2-0 in an hneh bawk.