Vawiinah National Games 2022 Opening Ceremony

National Games of India vawi 36-na opening ceremony chu vawiin hian Narendra Modi Stadium-ah neih a ni dawn a, India prime minister Narendra Modi-a'n a hawng ang. National Games hi infiamna hmanga state hrang hrang inelna a ni a, infiamnaa Mizoram dinhmun pawh Gujarat-ah hian a hriat ang.

Tun ṭum National Games-ah hian Mizoram aṭangin infiammi mipa 16 leh hmeichhe 29 an vaiin 45 an tel thei a, coaching staff chhiar telin Mizoram hminga feh chhuakte hi mi 60 an ni. MOA secretary general V. Lalzawmliana chu Mizoram Contingent Chef de Mission a ni a, Lalduhkima Sailo chu Dy Chef de Mission a ni thung.

Opening ceremony-ah hian Chief de Mission leh Dy Chef de Mission bakah Football, Archery, Weightlifting, Athletics leh Wrestling aiawhten an chhim dawn. Sorkar lam aṭangin Mizoram sports minister Robert Romawia Royte, sports department secretary Lalrozama IAS, MOA vice president Lallianṭhuama leh MOA joint secretary Joseph Thansanga te an tel dawn.

National Games hi khawpui parukah Ahmedabad, Gandhinagar, Bhavnagar, Rajkot, Surat leh Vadodara-ah te neih a ni dawn a, closing ceremony hi October 10, 2022-ah neih tur a ni.

Inelna hi Covid-19 leh chhan dang vangin kum sarih chhung neih a ni tawh lo a, inelna neih hnuhnun ber chu kum 2015 daih tawh kha niin Kerala-in a thleng. National Games 2015-ah khan Services-in gold 91 lain pakhatna an ni a, inelna thlengtu Kerala-in gold 54 lain pahnihna an ni thung.

Tun ṭum inelnaah hian India ram state 28 leh Union Territories pariat bakah Indian Armed Forces te tel tura beisei a ni a, infiammi 7,000 bawr vel an pung khawm dawn.