Vietnam hmaah India an zawr

Hung Thinh Friendly Football Tournament-a an match hnihnaah India an mualpho a, inelna thlengtu Vietnam chu 3-0 in an ngam lo - Igor Stimac hoin chak nei lo chungin India an rawn kir.

Vietnam tan Phan Van Duc chuan minute 10-na lekah goal hmahruai a khung a, Nguyen Van Toan leh Nguyen Van Quyet ten khung ve lehin, Blue Tigers-in a chhanletna tur an nei lo.

India tan Ashique Kuruniyan, Sahal Abdul Samad, Sunil Chhetri leh Sandesh Jhingan ten goal khungna remchang nei ṭheuh mah se an chhawr thei lo a, khualmualah 3-0 in an tlawm.

Croatian coach Igor Stimac-a'n Lianzuala Chhangte chu squad-ah telh mah se a ring ngam lo a, Singapore laka minute 90-naa luhtir forward hi Vietnam lakah pawh minute 86-naah a luhtir.

Durand Cup top scorer tan danglamna thlen turin hun a awm tawh lo a, India-in mualpho tak chungin Vietnam an mangṭha - team pathum inelnaah pahnihna an ni.

Vietnam hian match hnih an khelhah hnehna an chang ve ve a, match hmasa zawkah 4-0 a Singapore hnehin, match hnihnaah 3-0 in India an hneh leh ta.

Inelna thlengtu team hian point ruk hmuin an sang ber a, $30,000 (Rs. 24,55,965) an dawng. India hian match hmasa zawkah Singapore chu 1-1 in an inhnehtawkpui a, point khat ve ve nei mah se Vietnam laka goal an chhuah tlem zawk avangin pahnihna an ni a, chak nei lo mah se $20,000 (Rs.16,37,550) in an rawn hausa haw.

Pathumna Singapore pawhin pawisa an dawng tho a, $10,000 (Rs. 8,18,775) a hausak belhin Vietnam an chhuahsan a ni.

Hung Thinh Friendly
Football Tournament

September 21, Nilaini Zan
Vietnam 4 - 0 Singapore
VIE: Nguyen Van Quyet 37'; Nguyen Thanh Nhan 50'; Ho Tan Tai 71'; Khuat Van Khang 84'

September 24, Inrinni Zan
India 1 - 1 Singapore
IND: Ashique Kuruniyan 43'
SIN: Ikhsan Fandi 37'

September 27, Thawhlehni Zan
Vietnam 3 - 0 India
VIE: Phan Van Duc 10'; Nguyen Van Toan 49'; Nguyen Van Quyet 70'