Tunisia tan Brazil an thiam mah mah

World champion vawi nga ni tawh Brazil hi Qatar World Cup khel turin an inpeih ta hle. South American ram hian Thawhlehni zan khan Tunisia chu 5-1 teh meuhin an sawp a, football khawmpui lian khelh turah champion rinkai an ni dawn.

Barcelona forward Raphinha goal khung chu, rin loh tak maiin Tunisia lamin Montassar Talbi hmangin an sut. Mahse, Tite-a nauten Richarlison leh Neymar te hmangin an khung belh zui.

Chawlhlawk hma deuhin Richarlison-a'n a goal hnihna a khung hman a, chumi hnuah Tunisia defender Dylan Bronn chu hnawhchhuah a ni. Goal thum an phurh bakah player pakhata an tlem zawk avangin Tunisia tan thawh leh ngaihna a awm tawh lo.

Tite-a'n a player enchhinna hun ṭha a ni tih a hria, player paruk ngawt a thlak kual. Second half-ah inkhel thunun chungin Pedro hmangin an khung belh a, an goal khungte hi Brazilian tih ṭhin danin lam chungin an lawm.

Inkhelh bana sawi zui hlawh pakhat chu Richarlison a ni. Tottenham Hotspur forward hi a goal khung lawmin mual sirah a tleng a, hetih lai hian fans lamin khelmualah balhla an vawm lut. Midum thlah a ni a, zawng ang maiin balhla ei rawh, an tihna a ni.

Richarlison chuan, "Thil dik lo titu an awm a, a tidik lotu tak hi man chhuah a ni a, hremna an hmu zel a nih loh chuan chi inthliarna lam hi chu a reh mai mai lo ang. A nihna takah chuan hetiang thil hi chu ni tin a thleng zawk ni berin ka hria," tiin a sawi.

Inkhelh hmain Brazil hian chi inthliarna an duh lohzia lantir nan thuziak an tarlang. Chu tah chuan, "Kan mihang player tel lo chuan, kan jersey a arsi lem chuang hi kan nei thei lo ang," tih an ziak.

Brazilian Football Confederation (CBF) president Ednaldo Rodrigues chuan, "Hetiang thil hi chu khelmual chhung leh pawnah pawh ni se, pawm theih a ni lo," tiin a sawi ve bawk a ni.

Brazil jersey-ah hian arsi lem panga a chuang, hei hi world champion an nih tawh zat a ni. Tite-a naute hian Qatar World Cup an match hmasa ber atan November 24 hian Serbia an hmachhawn ang.