Dan theih loh Messi leh Argentina

Goal khung kawngah Lionel Messi ke a hmui leh laklawh tawh a, club leh ram tan a hawina lam apiangah goal a khung zel. Nimin zing khan Argentina captain hian goal hnih khungin an ram chu Jamaica lakah 3-0 in hnehna a chanpui.

Red Bull Arena-a inkhelah Argentina coach Lionel Scaloni chuan Messi hi hahchawlhna hun a siamsak, inkhel bul ṭan loin bench lamah a ṭhu hmasa. Minute 13-na lekah Manchester City striker Julian Alvarez chuan goal a khung.

Argentina hian goal dang erawh an khung mai lo, forward Messi luh hnuah erawh inkhel a danglam. Paris Saint-Germain hmatawng ṭha mi hian box pawn aṭangin laklawh nei miah loin a khung zawt.

Hun a la tawp lo deuh, box pawn deuhah bawk free kick an hmu zui. A pet tura rawn ding chhuak Messi chuan player intlar an zuan kan avangin lei hrulah a pet thut a, keeper Andre Blake tana dan phak lohin goal kilah a lut.

Argentina coach Lionel Scaloni chuan, "Lionel Messi inkhel hi chu hmuhnawm ti taka en tawp mai tur a ni. Khawi ram nge i nih a pawimawh lo, amah enkawltu coach ni lo pawh ni ila, a inkhel en tur hian ticket ka lei mai ang," tiin an captain a dah sang vet vet hle.

Messi hian ram tan match 164 aṭangin goal 60 a khung tling ta chiah a, an ram hi tun hnaiah a zawnin match 35 chhung chu tlawm nei loin an kaltluang ta - Qatar World Cup khelh hlan an nghakhlel tawh khawp ang.

World champion vawi hnih ni tawh Argentina hian World Cup an match hmasa ber atan, November 22 hian Saudi Arabia an hmachhawn dawn a ni.