A hmun ngaiah Alcaraz

Mipa tennis thuneitu sang Association of Tennis Professionals (ATP) chuan tunkar khan world ranking thar an ti chhuak, a chung berah Spanish rawlthar Carlos Alcaraz a awm chhunzawm.

Kum 19 mi Alcaraz hian US Open nomawi a chawi bakah world number 1 nihna a chelh nghal. New York khawpuia inelna an neih zawh aṭangin number 1 a la ni chhunzawm, tun hnai khan hun rei tak chhung ranking sang ber nih theih a duh thu a sawi chhuak a ni.

Grand Slam vawi thum champion tawh Stan Wawrinka chuan nasa takin hma a sawn. Hliam vangin season thum vel a inkhel mumal lo a, a ranking pawh a hniam hman hle. Moselle Open-ah semifinal a thleng a, hei vang hian player 91 kal kanin world number 193 a ni ve leh ta.

Covid-19 vaccine a lak duh loh vanga inkhel tam lo Novak Djokovic chu pasarihnaah a awm zel. Rafael Nadal pawh US Open hnuah tournament pangngai la khel leh lo mah se pathumnaah a la inhamtang.

Asia khawmualpuiah tennis season an la hmang mek a, a thiam zual pariat inelna ATP Finals pawh Italy rama khawpui pakhat Turin-ah khelh hmabak a la ni bawk.