Keimah hi ka keimah lo

Zawi muangin fur khuain min kiansan mek zel a, kan chenna Zoram nuam pawh kum khata kan nghahfak favang boruak lamah a inher rem mek. Indian cricket team lam pawh, Khuangchawi thla laihawla, Australia lama nghah tur, ICC T20 World Cup an khelh tura inpuahchahna hnuhnung ber chu South Africa nen mahni tualzawlah an ṭan leh ta. Nizan lam khan a ṭum khatna inkhel chu Trivandrum lamah an khel nghe nghe a nih kha.

Rohit Sharma leh Virat Kohli-ten run siam dan an la theihnghilh lo tih a chiang a, chutihrual chuan, anmahnia theihna sang ber an lo pholan fo tawh ṭhin erawh an la pho chhuak lo a tih theih. KL Rahul erawh vawiin lama nipui vanglai, a tuk leha thlasik vur tlakna hmuna awm ang mai hian a khelh dan hi a la inpersan ṭhin hle.

Version dang zawng zawng aiin, T20-ah hian a chung lama awm batter pathumte hi an pawimawh zual, ball hmachhawn tam ber an nih bakah team te tana kailawn leh dinhmun siamtu an ni. T20 World Cup-ah chuan an game sakhat leh nghet leh ropui ber an phochhuah ngei a ngai dawn.

A vawm lam department-ah erawh, death over-ah duhthu an sam tawk lo tih a chiang a. Hetah tak hian Jasprit Bumrah-a'n mawhphurna a kovah a nghah nasat lehzual a ngai dawn tih a chiang. Pitch ball sawt ṭha leh kawi zawk zawk lem loah spinner Yuzvendra Chahal a hi a ha a hriam tawk ta lo em aw?

Engpawh nise , tun hnaia Australia nena an intum zawh chiah leh tuna South Africa an lo mikhual leh hi inpuahchahna hun ṭha tak ni mahse, khelmual zau zawk leh pitch inang lo lutuk Australia ramah eng nge an an dawn tih chu hunin a hril ang.

Tun dinhmunah erawh Hamara Desh hi a la Hamara Desh chiah lo.

Domestic Cricket
BCCI Domestic Season ṭan a lo hun leh dawn ta a, a professional - senior team ho pawh Rajkot-ah inkulhin, Syed Mustaq Ali T20 atan inbuatsaihna a kal fawr hle. Tin, women's team-te leh age group chi hrang hrangte pawhin an bei ngawrh tawh hle bawk.

Hmasawnna tam tak a kum telin kan hmu zel a. Chutihrual chuan, kumin Senior Team Mustaq Ali leh 50 overs Vijay Hazare chu, dil chen thiam tawkna aṭanga tuifinriat zau taka theh thlak thut ang maiin, North East group awm ṭhin chu ṭhiat darhin Palian ho zinga an han sapatal ve a ngai dawn ta.

Zep thu a awm lo, thilmak a thleng a nih loh chuan, hnehna chan a bar pawh an nei kher lo ang. Tlawma lak tur awm hek suh. High Sikul Sports a, primary sikul va tel ang deuh nihna chen pawh a awm awm e. Mahse, hetiang hun ṭha hi, tuna kan rawlthar leh senior player ṭhenkhat kaihhruaina hnuaiah, meialh hmanga baptisma chang ang an ni dawn.

Rawlthar Sangzela'n Mumbai batsman ṭha a thiat! Senior team-a debut Hriatrenga'n, Vidarbha lakah 50 a siam tih te hi kan headline nulh nulh lo ang tih tu nge sawi thei? Chutihrual chuan Domestic cricket kan khelh ve tak hnu hian, Mizoram hi a la Mizoram thei tak tak lo a, kumin hian pen engzah takin nge hma kan sawn theih ang? Hunin a hril ang chu!

Local- Mizoram Cricket
BCCI inthlan ṭhat hun atan October 18 chu ruat a ni ta a. India rama dinhmun pawimawh ber chu Prime Minister a ni a, a dawt lehah chuan BCCI President hi a ni, an ti ṭhin. Engtin tak maw boruak inlumlet ang? Hemi rual emaw zul hian Cricket Association of Mizoram pawh term khatna lo hmang zo tain, hruaitu inthlan ṭhat a lo ngai dawn ta bawk.

Ni e, khatia BCCI huang chhunga kan han lut thut kha, arkhawthimdai chungin, a hruaitu, a inkhela te leh a tupawh maite kha kan han tal ve nawk nawk a nih kha maw. Kih hnawh pawh a tam, hmasawnna pawh a bang bik lo - a ken tel a ni. Amaherawhchu, he bung thar, term hnihna kan lo chuankai leh turah hi chuan, chhuanlam tur chu ṭhal tuikang ang maiin a vang chho tawh dawn a, NGO leh tlawmngai pawl inkaihruai vela chawm len khan Professional Sports Organization (Industry pakhat) kaihhruai hna hi formula hran daih a ngaih thu kan hre chhuak zel ta bawk.

Governance danglamna te, administration hranna te, management biknate a takin kan man ta zel a, chutiang bawkin a inkhela te (players) ho pawh nasa takin hma an sawn ang hian, helam panga, a fawng chelhtu, a engine lam department-te hian eng ang chiahin nge hma kan sawn ve dawn le? Hun bawkin a hril chho ang. A engpawh nise hmasawnna hi a zuang zel turah ngai ang.

Aw, Mizoram cricket,

i tel lo chuan keimah hi ka keimah zo si lo.

- K. Vanlalruata