Nghah rih a la ngai ang - Verstappen

Pathianni zan tir lamah Formula 1 Singapore Grand Prix tlan a ni dawn, world champion lai Max Verstappen chuan a nomawi humhim theih nghalna nei mah se, tun ṭum intlansiakah chuan a nih a la rin loh thu a sawi.

Red Bull driver hian hnehna chang se, championship lama amah hnaih bertu Charles Leclerc a chesuala point a hmu lo a nih chuan Max-a hi a champion fel der dawn, world champion kan hmu thut thei reng tawh.

Mahse, Verstappen tan thil awlsam a ni dawn bik lo - Marina Bay Street Circuit-ah hian tun hmain hnehna a la chang ngai lo, thil mak thlen tir tur chuan tun hma lama a tih theih ngai loh a tih a ngai dawn tihna a ni.

Dutch tlangval Verstappen chuan, "Thil thleng thei chu a ni a, mahse chumi tur chuan vanneih a ngai tel dawn. A nihna takah chuan tun maiah chuan a thlen ka la ring lo, hun ṭha dang ka la mamawh ang," tiin a ṭawng fimkhur hle.

Verstappen hian amah hnaih bertu Leclerc aiin point 116 teh meuhin hma a hruai fal a, a teammate Sergio Perez aiin point 125-in a sang fal bawk, a tawi zawnga sawi chuan a vawi hnih nan world champion chu a ni leh ngei dawn.

Intlansiak hmabak panga nei chungin champion theihna kawng a inhawng tihna a ni a, a champion thei a nih ngat chuan Michael Schumacher (2002) nih rualin F1 champion ni tura season hman rei ngai lo ber a ni ang.

Verstappen chuan sawi zawmin, "Singapore-ah hian hnehna chan tumin ka kal dawn, thil dang chu hunin a la hril ang chu. Season duhawm tak kan hmang mek a, keimah chauh ni loin team hnathawh a ni," tiin a sawi.

Season hmasa khan, intlansiak tawp berah Verstappen hian Lewis Hamilton a tlan pel a, world champion vawi sarih ni tawh lak aṭangin nomawi a chhuhsak - kuminah erawh a nomawi kawl lai chuhpui phaktu a tawng meuh lo.