Chhinga Vengin Chawnpui an hneh

Zote Honda MPL9-ah Chhinga Vengin an record ṭha tak chhawm nung turin nimin khan Chawnpui FC 1-0 in an hneh. Anand Gurung leh Lalremruata hote hian tun season-ah hneh loh an la tawng lo.

Chhingcows hi pahnihnaah an awm mek a, round 6 khelh hun an sawn avangin an hmachhawn leh hmasak ber tur chu Aizawl FC a ni. Khawzawl mipui an vannei dawn - an khawtualah MPL pakhatna leh pahnihna inkhel an en thei ang.

RG Stadium-a goal awmchhun hi minute 29-naa Chawnpui defender Ephraim Vanlalduhsaka'n an lama a tihluh anga chhinchhiah a ni. Thil thlen dan thlir chuan Chhingcows captain Silvana R. Lalruatkima goal anga ngaih theih a ni thung.

Chhinga Veng forward Lalchhanchhuaha (Jerry) cross chu Johny Lalremruata'n goal-ah chantir thei lo mah se Serchhip tlangval hian fing takin a tlawh let a, Silvana hian goal-ah petin Ephraim-a a per hnuah a goal.

Chhinga Vengin chak phu mah se cleansheet turin keeper RS Lallawmzuala a che ṭha a, Chhingcows keeper hian David Lalrinmuana goal khung tur ṭha takin a dang.

Chawnpui coach Lalsangzuala Hmar chuan, "Beiseina sang tak nena kan lakluh kan striker ṭhaten goal khung an harsat a, beisei an pha lo. Kan club-in result ṭha kan neih nan kan striker-ten an theihna an lantir a ngai," tiin Vanglaini a hrilh.

Chhinga Veng coach Anand Gurung chuan, "Goal kan khung a, a lawmawm. Chutihrualin chance kan insiam tam ngaihtuahin pet goal kan la harsat - kan insiamṭha zel ang," tiin a sawi ve bawk.