Electric Veng a êng ta

Electric Veng mipuiin Zote Honda MPL9-a an chak hun tur beiseinain an thlir ṭhin a, hmuh tur a awm ṭhin lo. MPL ṭan aṭanga ni 20-naah erawh Electric Veng a êng ta a, nimin tlai khan RG Stadium-ah FC Bethlehem 3-2 in an hneh.

Electric Vengin hnehna an chan takah chuan MPL club zawng zawngin chak an nei ta vek a, an point dinhmun thlirin an intluk tawkzia a lang. Chawnpui, EFC leh FCB ten point li ṭheuh an hmu.

Goal nga luhna
Electric Vengin bul an ṭan ṭha a, minute rukna lekah Vanlalremsanga'n midfield aṭanga a ball hmuh chu Bethlehem keeper Vanlalpeka pet khum nan a hmang - goal mawi a ni. First half-ah EFC-in goal an khung belh a, man of the match-a thlan Vanlalremkima'n (Tetea) box pawn aṭangin goal kilah tak a dah.

Bethlehemin goal chhuah an awlsam a, goal khung pawh an awlsam. Second half-ah FCB midfielder Lalnunzira chuan Tetea tih theih ang chu ka thei ve alawm, ti niawm takin minute 64-naah goal mawi a rawn khung ve bawk.

EFC an insiamrem rang a, Remsanga thlaktu Malsawmhlua'n minute 67-naah H. Zawnhmingthanga siamsak chu goal-ah a chantir. Amaherawhchu minute 84-naah Lawmsangzuala'n Bethlehem tan goal ṭha bik a rawn khung leh a, hun tawp thlengin inkhel boruak a sang.

Electric Vengin goal chance an ngah a, Lalsangkima'n captain David Lalchhuanawma pe mai loa a pet out-te chu chance uiawm bik a tling. Bethlehem pawhin chance an miss ve tho a, mah se Electric Vengin point thum hmuh an phu.

Electric a êng
EFC manager Vanlalsawma Colney chuan, "Kan tum a, player-te pawhin an tum a, kan inkhel tur atan hian zaa za kan pe. Point thum kan hmu hi kan lawm takzet. Bethlehem hi kan tiatpui an ni a, kan budget pawh a inang tawk vel. Keini chuan relegation battle-ah kan ngai a, tih takzetin kan khel a, hlawhtlinna kan hmu," tiin Vanglaini a hrilh.

Sawma chuan sawi chhunzawmin, "Coach Jakob-a training a ṭha em em a, player-te pawh an ṭang bawk. Hnehna kan chan hmasa ber hi veng mipui leh main sponsor Marco O'Polo tan kan hlan a, anni hi kan tan an hlu a ni," tiin a sawi.