Arsenal tan Alexandre Lacazette

Arsenal player manto ber Alexandre Lacazette chuan Thawh­ṭanni zan khan an mi­khual West Brom lakah goal hnih khungin a club thar 2-0 in hnehna a chan pui.

West Brom mid­fielder Gareth Barry-a'n Manchester United winger hlui Ryan Giggs a record khumin Pre­­mier League match 633 a khel tling a, record thar a siam bawk.

Inkhel chu
France striker Lacazette-a'n Emirates Stadium-a a league match hmasa pahnihah goal a khung tawh a, Baggies lakah pawh hian minute 20-naah Alexis Sanchez-a free kick pet chu West Brom goalkeeper Ben Foster-a'n nam perin crossbar a per hnuah hnai tak aṭangin a khung.

West Brom tan Jay Rodri­guez chuan an si phurh a sut teuh hle. English forward Rodri­guez hi box chhungah Gunners defender Shkodran Mustafi-a'n a titlu a, referee Bobby Mad­ley chuan penalty a pe lo - Rodriguez hian goal ban a pet per zui tho bakah a ball tauh lut ngei tura ngaih chu goalline aṭangin Nacho Monreal-a'n a petchhuah sak bawk.

Second half-ah Arsenal tan midfielder Aaron Ramsey-a'n penalty a hlawh a, pet tur rawn ding chhuak pound maktaduai 46.5 man Lacazette tan goal-a chantir kawngah harsatna a awm lo. Brian Marwood (1988) tih lohah chuan Lacazette hi Arsenal player zingah mahni khelmuala match hmasa pathuma goal khung vek thei awmchhun a la ni.

Arsenal an harh
Arsenal hian an league match hnuhnung zawkah cham­pion lai Chelsea chu khual­mualah goal awm loin an inhneh­tawk pui a, Liverpool laka an mualpho hnuah inelna hrang hrangah hneh loh nei loin match nga chhung an kaltluang leh tawh.

Chile international Sanchez leh Lyon striker hlui Lacazette ten a vawi khat nan Gunners tan inkhel bul an ṭan rual a, France international goal hmasa zawk khan Sanchez siamsak niin Barcelona forward hlui hian season hmasa a game kha la phak lo deuh mah se player hlauhawm tak a ni leh tawh - minute 83-naah lakchhuah a nih laiin fans lamin 'standing ovation' an pe hial.

Arsenal manager Arsene Wenger chuan, "West Brom khan min nawr na hle a, a bik takin first half chhung phei kha chuan min chhaih buai hle a ni. Inkhelh harsatna hunah player ṭha bik an rawn lang ṭhin, Lacazette hian a khel ṭha thei hle a, a ball khawih a dikin a che vel pawh hmuh a nuam hle," tiin a striker thar a fak.

Manchester City, Manches­ter United leh Chelsea te angin Arsenal hian rin an kai rih lo a, an game a la ngelnghet tawk lo bawk. Amaherawhchu, Reds laka an mualphona khan Wenger leh a naute hi a beng harh tih a chiang a, zawi muang hma lam an pan mek a ni. Ninga­ni zanah Belarus club FC BATE Borisov nen Europa League group match an khel ang.

Baggies tan a na
West Brom manager Tony Pulis-a'n Emirates Stadium-ah result ṭha a nei thei lo, vawi 10 a lenluh tawhah a tlawm haw vek. Pulis hian Mustafi-a'n Rodriguez a tihtluk vanga penalty pek an nih loh chu mak a ti a, goal hmasa zawk a luh dawna Jonny Evans-a'n Moha­med Elneny lakah a foul an ham chu mak a tih thu a sawi bawk.

West Brom manager Tony Pulis chuan, "Arsenal lakah game ṭha tak kan khel a, kan chanvo ang tur pek kan nih loh vang chauha point hmu lo kan niin ka hria. Inkhel entu zawng zawng kha chuan Rodriguez khan penalty a phu hlein ka hria, Gunners defender kha hrem tur a ni a, player 10 hmachhawn ni ila chuan result pawh a danglam ang," tiin a sawi.

A la tawp lo - Barry
Thawhṭanni thleng kha chuan Barry leh Ryan Giggs ten Premier League match an khelh zat (632 games) a intluk a, Arsenal a hmachhawn leh chiah khan kum 36 mi Barry hian Manchester United legend khumin record thar a siam.

Aston Villa, Manchester City, Everton leh West Brom tan a khel tawh Barry hian Premier League match 633 a khelh chhung hian goal 52 a khung a, Manchester City tana a khelh lai 2011-12 season khan league leh FA Cup nomawi a chawi.

England international midfielder hlui Barry chuan, "Ka tan chuan chawlhkar nuam leh hlu bik a ni. Mellung pawimawh ka phun thei hi ka lawm a, ka kum a tam deuh tawh nachung hian match pawimawh ka la khelh zel theih ka beisei," tiin a sawi.