Moscow-ah Man United fiahna
Manchester United chuan zanin dar 12:15 hian Russia-ah CSKA Moscow an hmachhawn dawn a, Sony Ten 1-ah an pe chhuak ang. Jose Mourinho hian hote hi UEFA Champions League group A match hmasa berah Basel 3-0 in an hneh a, CSKA hian Benfica chu khualmualah 2-1 in an hneh ve bawk. Point la hmu lo pahnih Basel leh Benfica te chu St. Jakob Park-ah an inkhel ve bawk ang.
United chungnung
Moscow lakah United-in record an nei ṭha zawk a, vawi li an inhmachhawn tawhah English club hi ṭum hnih chakin vawi hnih dang erawh an inhnehtawk.
An inhmachhawn hnuhnung ber chu 2015-16 season Champions league kha niin Russia-ah 1-1 in an inhnehtawk a, Old Trafford-ah Wayne Rooney goal hmangin United an chak. 2009-10 season-ah erawh United hi khualmualah 1-0 in an chak a, an mualah 3-3 in an inhnehtawk thung. Red Devils hian an chakna pahnihah hian goal khat ve ve chauhin an chak.
Thlirlawkna
United defender Eric Bailly leh Phil Jones ten hremna an hmang zo tawh a, Jose Mourinho-a'n tlarhnungah Premier League match zawng zawnga a chhawr pahnih nge Basel an hmachhawn ṭuma inkawp Chris Smalling leh Victor Lindelof te a chhawr ang tih hi zawhna a awm thei a ni. Malpui hliam vangin Paul Pogba chhawr theih a la ni lo a, Russia zin tur zingah Southampton an hneh ṭuma inhliam Marouane Fellaini chu a zin ve thei lo bawk.
CSKA right back rinrawl Mario Fernandes chu kartawpa Dinamo Moscow nen an inhnehtawk ṭuma a inhliam vangin United a hmachhawn theih hmel loh a, attacking midfielder Aleksandr Makarov chu ngalrek hliam vangin a awl a ṭul bawk. CSKA hian season liam ta khan Spartak Moscow tluk loin an league-ah pahnihna an ni a, tun season-ah palinaah an awm mek.
Russian Premier Liga-ah CSKA hian match 11 aṭangin point 20 chauh an hmu a, amaherawhchu Russian club hian Champions League khel turin qualifying round-ah AEK Athens leh BSC Young Boys te an hneh a, goal an chhuah lo.
Manchester United hian September 30, Inrinni zanah point la hmu lo Crystal Palace an hmachhawn dawn a, Eagles hi point hloh theihna ni mah se Jose Mourinho hote hian league match ngaituah buai loin Champions League-ah an rilru zawng zawng an pe thei ang.