Police-in talchhuah dan an zawng Coach atan BS-a Colney an lalut

Mizoram Police-in Mizoram Premier League Season 6-ah match nga khel tawhin point khat chiah an la hmu a, Mizoram football league sang ber khelh zel la duhin coach atan Lalbiaksanga Colney an lalut.

Armed Veng pa BS-a Colney hi season liam ta MPL-a Bethlehem Veng­thlang FC final thlenpuitu kha a ni a, Mizoram Police hian September 28, Ningani zan hian Chanmari West an hmachhawn nghal ang.

Police dinhmun

Mizoram Police hi MPL club zinga inpuah­chahna nei hmasa ber an ni a, tun season ṭan nana inelna neih MFA Super Cup-ah team ṭha ber zinga mi an ni. Ṭialthawnga kaihhruaina hnuaiah Police hian semifinal an thleng a, West Warrior lakah penalty shootout-ah an vanduai.

I Day Football-ah Police hian Chanmari West lakah phuba lain 2-0 in hneh let mah se an inkhelh hma hian team pahnih hi an tla tawh a, Police hian group stage match hmasa pahniha Chhinga Veng leh Chan­mari FC an hneh lo. West Warrior laka an phuba lakna leh Rhino Charge 6-1 zeta an sawpna chu engmah loh mai a ni.

MPL ṭan hmain Po­lice champion rinkai ni pha lo mah se relegate chiang tura ngaih erawh an ni lo. Amaherawhchu, Police hian Bethlehem Vengthlang FC lakah point an hlawh chhuak a, an hmachhawn dang pali Chhinga Veng (1-4), Chanmari FC (1-4), Dinthar FC (2-3) leh Ai­zawl FC (1-6) lakah erawh ṭang tur an awm lo.

Police hian inkhelh ṭantirh lamah ṭha takin khel ṭhin mah se hun tawp lamah an zuai ṭhin avanign phurna thar an nei a, hei vang hian MPL-a hruai kaitu Ṭialthawnga an thlak hi thil mak a ni lo.

Chhan tlak an awm!

Season liam ta khan Dinthar FC chuan round 5 khelh zawhah point hnih chiah hmuin table mawngphahah an awm a, season tawpah point 16 hmuin palina an ni a, se­­mifinal thleng thei din­hmunah an ding hman bawk.

MPL4-ah Mizoram Police hian round 5 khelh zawhah point li an hmu a, season tawpah point 12 hmu tling leh mah se an relegate tho. Police hi chhan tlak an la awm a, amaherawhchu MPL history-a foreigner tam berna season-ah hian foreigner awm lohna Police hmabak hi a awlsam lo ang.

Tu nge BS-a chu?

Police coach thar Lal­biaksanga Colney hian tual­chhung football-ah player leh coach angin ani aia sulhnu nei ṭha sawi tur an tam lo.

Kum 1995 khan SAI Hostel, Guwahati-ah a awm a, 1996-98 chhung khan Dynamo club (Guwahati) tan khelin an player langsar pawl a ni.

Mizoram a rawn let hnuah 1st Bn MAP a zawm a, Police hi nomawi vawi engemaw zat a chawipui a. Kum 2003 khan a captain-na hnuaiah an veng Armed Veng chu CYMA Football-ah a champion pui bawk. Coaching lama a sulhnu pawh hi chhuan tham a tling. Pachhunga University College football team chu ṭum thum enkawlin vawi hnih a champion pui a, an vanduai ṭum hian pathumna an ni. CYMA Football-ah an veng Armed Veng chu vawi thum zet a champion pui bawk.

Season liam ta khan BS-a hian BVT a enkawl a, MFA Super Cup leh I Day Football-ah result ṭha nei lo mah se MPL-ah erawh league round-ah hmahruaitu an ni. BVT hian final thleng turin semifinal-ah Chanmari West an hneh a, Police-in BS-a hnuaia an match hmasa berah West Warrior a hmachhawn nghal ang.