AFC Cup Bengaluru hmaah final a inchhawp
Season hmasaa Indian club zinga AFC Cup final lut hmasa ber dinhmun luahtu Bengaluru FC-in a zawna final lut turin match hnih chiah an hmabak ta - zanin dar 7:30 hian Inter Zonal final-ah FC Istiklol an lenchilh dawn.
Inter Zonal final hi a awlsam zawnga sawi chuan semifinal ang a ni a, inkhel pahnih belhkhawma chak zawkin AFC Cup final an lut ang. Blues hian hnehna an chang thei a nih chuan October 18-a second leg an khelh hunah hna a awlsam sawt dawn tihna a ni. Inkhel hi AFC Cup chuan an facebook page-ah live streaming-in an pe chhuak ang.
Tute nge zin?
Bengaluru boss Albert Roca-a'n Tajikistan-a zin turin player 18 a hruai a, a hruai zingah Mizo pali goalkeeper Lalthuammawia Ralte, defender Zohmingliana Ralte, midfielder Malsawmzuala leh striker Daniel Lalhlimpuia te an tel vek - zaninah inkhel bul an ṭan erawh a beiseiawm loh.
Ṭum dang ang bawkin India number 1 Gurpreet Singh Sandhu chu si ban nghak tura beisei a ni a, tlarhnungah Harmanjot Khabra, Juanan, Rahul Bheke leh Nishu Kumar-te inkawpin midfield-ah ball sem turin Erik Paartalu, Dimas Delgado leh Lenny Rodrigues te awm tura beisei an ni a, tlarhmaah Sunil Chhetri, Udanta Singh leh Toni Dovale an inkawp leh ang; 4-3-3 formation an hmang dawn tihna a ni.
Tute nge Istiklol?
Tajik League champion Istiklol hian an ram league-ah hian tun hnai kum riat chhungin vawi ruk lai champion dinhmun an luah thei a, season hmasa an champion-na kawngah league match nga hmabak la nei chungin an champion an nemnghet thei - khingpui awlsam an ni dawn lo.
Kum 2015 AFC Cup finalist Istiklol hian Inter Zone final lut tur hian an khelmual an hmang thiam ṭhin hle - AFC Cup khelh mekah an khelmualah hian goal 10 ngawt an khung tawh a, goal khat chiah an la chhuah. Inter Zone semfinal-ah khan second leg khelh a nih hma hauhin an dinhmun tur an tichiang tawh a, Ceres Negros chu an mikhual ṭumin 4-0 in an sawp. Bengaluru tan khualmualah chak a harsa dawn tihna a ni a, fimkhur a ṭul ang.
Bengaluru innghahna
Bangalore club-in a zawna AFC Cup final luh an tum em avangin Norwegian club Stabæk aṭangin Gurpreet Singh Sandhu chu sum tam tham tak sengin an lalut a, zonal semfinal-a April 25 an hneh ṭumin an tihsual lohzia a lang - Punjab keeper hian Bangalore khawpuia North Korean club an hmachhawn ṭumin save ropui tak tak a nei a, North Korea lama an zin ṭumin penalty a dang bawk - Bengaluru tan a ṭangkai leh ang.
Tlarhmaah Sunil Chhetri bawk innghahna a ni leh dawn - AIFF player of the year ṭum li ni thei hi box chhunga a hlauhawm tluk zetin set piece pet thiam a ni a, Istiklol tlarhnung tan ven uluk bik tur a ni. Manipur winger Udanta Singh-a'n a tlanchakna leh tharum ngahna chhawr ṭangkai leh ngei a tum ang a, Toni Dovale lah MLS leh Spanish La Liga thlenga lo hmelhriat tawh a nih avangin ven nuam a ni dawn lo.
Tunge ven tur?
Istiklol-in AFC Cup-ah 4-4-2 formation an hmang ṭhang a, coach Mukhsin Mukhamadiev-a'n he formation bawk hi a hman nawn a rinawm. Tlarhmaah hian Manuchekhr Dzhalilov chu innghahna a ni leh dawn - Tajikistan tan vawi 21 inlana goal 14 khung thei striker hian season hman mekah Istiklol tan match 27 khelin goal 24 a khung tling leh der tawh a, AFC Cup-ah match riat khelin goal sarih a khung.
Dzhalilov thlawp turin Russian forward Dmitry Barkov a awm ang a, midfield lai aṭangin Ghanaian midfielder David Mawutor leh Amirbek Juraboev-ten ball an sem ang. Istikol full back Akhtam Nazarov hi ngaihthah thiang lo tur a ni dawn - mual vei lam sir aṭangin a goal nawr a na ṭhin hle.
Bengaluru player zinte
Goalkeepers : Gurpreet Singh Sandhu, Lalthuammawia Ralte.
Defenders : Rahul Bheke, Subhasish Bose, Zohmingliana Ralte, Collin Abranches, Juanan Gonzalez, Nishu Kumar;
Midfielders : Erik Paartalu, Dimas Delgado, Antonio Dovale, Lenny Rodrigues, Alwyn George, Harmanjot Khabra, Malsawmzuala.
Strikers : Sunil Chhetri, Udanta Singh, Daniel Lalhlimpuia.