Atletico khelmualah Premier League champion
Zanin dar 12:15-ah Champions League group stage match khelh a ni dawn a, Atletico Madrid-in Chelsea an mikhual tur chu mipui ngaihven hlawh zual a ni - Chelsea hian an match hmasa berah FK Qarabag an hneh laiin Atletico erawhin Roma an inhnehtawkpui thung a, Diego Simeone-a naute tan chak a ṭul lehzual tihna a ni.
Atletico Madrid-in tun season-ah tlawm hmel an la hmuh loh laiin Chelsea erawh an league match hmasa berah Burnley an ngam lo thung - club pahnih tun hnaiah an khel ṭha tluang a, coach huaisen pahnih inhmachhawn tur an nih bawk avangin a hmuhnawm lo thei lo ang.
Thawnthu hlui
Tun hmain Atletico Madrid leh Chelsea match ngaah an lo inhmachhawn tawh a, Atletico an chungnung zawk - match hnih hnehna an chang a, vawi hnih an inhnehtawk a, Blues-in vawi khat hnehna an chang ve. Club pahnih intawn hnuhnung ber chu Champions League 2013/14 semifinal a ni a, Stamford Bridge-a 3-1 a hnehna changtu Atletico an tlang.
Atletico-in khelmual thar Wanda Metropolitano an nei tawh a, an khelmual hlui Vicente Calederon-a Chelsea nen vawi hnih an inhmachhawnah an inhnehtawk ve ve - club pahnihin he thawnthu hi thlak danglam an tum ang.
Simeone vs Conte
Diego Simeone-a'n nomawi la chawi tam tawk lo mah se sum nei ngah Barcelona leh Real Madrid karah Atletico Madrid a dinchan pui theih reng avangin khawvel coach
ṭha zingah a hming chhiar hmaih a ni ngai lo - zanina Antonio Conte nena an inhmachhawn tur hi khawvel hmuh chak a ni.
Italy-a a hlawhtlin hnuah Antonio Conte-a'n Chelsea a pan a, a season hmasa berah Premier League nomawi a chawi nghal. Italian manager-in Blues a pan hma khan Diego Simeone nen London club enkawl turin 'bukin' an awm nia sawi a ni. Leicester City boss hlui Claudio Ranieri chuan, "Manager rorum tak, tharum hman, attacking football leh thawhhona ngaipawimawh ve ve an ni a, an game style a in ang hle," tiin a lo sawi tawh a, Chelsea midfielder Cesc Fabregas chuan, "Anmahniin kalphung bik an nei ve ve a, chumi mila khel thei lo player an duh lo," tiin coach pahnih chungchang a sawi bawk - coach in ang pahnihah tu tak dingchang ang maw?
Griezmann vs Morata
Atletico Madrid tan ṭum dang ang bawkin Antoine Griezmann chu innghahna a ni leh dawn. French forward hian tun season-ah match nga khelin goal hnih a khung tawh - tun season-ah beisei angin goal la khung tam lo mah se Spanish club tan a season hnuhnung pathumah goal 25 aia tlem khung a nei ngai lo a, Chelsea tlarhnung tan ven uluk a ṭul ang.
Blues tlarhmaah Alvaro Morata sawi hmaih a thiang lo. Pound maktaduai 60 man striker hian Chelsea-in a laka heti zat sum an sen ngam chhan a pholang der tawh a, inelna hrang hranga match sarih a khelhah goal ruk a khung sak tawh - an match hnuhnung bera 4-0 a Stoke City an sawp ṭumin hattrick a siam a, a chet ṭhat chhawm nun a tum ang.
Hazard a chiang lo?
Eden Hazard-a hliamin dam lam pan tawh mah se minute 90 khel tur khawpin Conte-a'n a la ring tawk lo a, Premier League-a an match hnuhnung bera Stoke City an hmachhawn ṭum pawhin bench aṭanga tlan luhtir a ni. Chelsea boss Conte chuan, "Hazard-a'n hma a sawn theih nan theihtawp kan chhuah reng a, kan tana Hazard pawimawh zia chu in hre vek a ni. Tun dinhmuna pawimawh ber chu game pumpui khel tura a inpeih hi a ni," a ti a, Atletico hmachhawn turin a nau a duh a, a dinhmun erawh chiang takin a sawi lo.
Conte hian 3-4-3 bawk a hman leh a rinawm a, Hazard a inlan thei lo a nih chuan Pedro leh Willian chu tlarhmaa Morata thlawp tura dah an nih a rinawm. Atletico-in 4-4-2 formation an hman a rinawm a, tlarhmaah Griezmann leh Fernando Torres inkawpin mual sir aṭanga nawr turin Yannick Ferreira-Carrasco leh Koke an awm a rinawm bawk.
Sulhnu
• Diego Simeone kaihhruaina hnuaiah Atletico Madrid-in Champions League home match 23-ah vawi 18 hnehna an chang thei a, vawi li an khingpui inhnehtawkpuiin vawi khat an tlawm - an hneh loh awmchhun hi Benfica a ni a, September 2015 khan 2-1 in an tlawm.
• Atletico Madrid hian Champions League home match an khelh hnuhnung 19-ah vawi 16 clean sheet an nei thei.
• Chelsea-in khualmuala Champions League match an khelh hnuhnung pakuaah tlawm hmel an hmu lo a, vawi hnih hnehna changin vawi sarih an khingpui an inhnehtawkpui.
• Chelsea hian Champions League an khelh tawh vawi 14-ah vawi 13 last 16 an thleng thei.