Player langsar an chak lo nghal

Tennis inelna ngaih­hlut Grand Slam inelna pali khelh zawh a ni tawh a, season kal lai a tawp hnai tawh. Thawhṭanni aṭang khan China lamah Wuhan Open khelh niin hmeichhe singles player langsar Johanna Konta, Petra Kvitova leh Sloane Stephens te an tla nghal vek.

Champion lai Kvitova tan first round-a a khing­pui tur Peng Shuai hi huphurhawm tur niin a lang lo. Mahse, seeded pawh chang phak lo Peng hian inkhel inhnehtawk takah Czech Republic nula hi 7-6 (9-7), 6-7 (5-7), 7-6 (7-3) in a hneh.

World number 7 Konta pawhin beisei a phak bik lo, British nula hian set hnuhnung berah a service hum ni se hnehna chang mai tur a nih laiin a hum zo lo a, Australian nula Ashleigh Barty lakah 6-0, 4-6, 7-6 (7-3) in a chak lo zawkah a ṭang.

US Open champion Sloane Stephens pawhin hard court inelna liana a hlawhtlinna chu Asia lamah a chhawm ngawt thei bik lo. American star Stephens hi khawtual nula world number 55 Wang Qiang lakah 6-2, 6-2 in a chak lo.

Kum 24 mi Stephens chuan, "Tun hnaiah tour­nament ka khel hnem a, ka vannei reng thei ta bik lo a ni. Tunah world number 17 ka ni a, season tawpah chuan hei aia sang thlen theih ngei ka beisei ang," tiin a sawi.