Pune City-in coach thar nei

Indian Super League club Pune City chuan an coach Antonio Habas nen an inhmuhthiam loh hnuah a hmun ruak luah tur coach atan Ranko Popovic an lalut. Kum 50 mi manager hian season hmasa khan Thai League club Buriram United a enkawl a, mah se June khan an khingpui physiotherapist a ben avangin thla thum chhung atan hrem a ni - hrem a nih hnu lawkah hian banna thehlut nghalin ISL a rawn pan ta.

Serbian coach Popovic hian Japan lamah pawh an league sang ber J1 League club langsar Sanfrecce Hiroshima leh Cerezo Osaka a lo enkawl tawh a, Austrian club langsar TuS FC Arnfels leh FC Pachern enkawl tawh bawkin FC Spartak Subotica chu Serbian SuperLiga-ah champion nomawi a chawipui tawh.

Kum 50 mi coach hian Cerezo Osaka a enkawl laiin Uruguayan forward ropui Diego Forlan chu J1 League khel turin a lalut a, ram tana khel tlak khawpa rawlthar rual chher a thiamna chu a hmingṭhatpui hle.

Popovic hian 2014-15 season-ah khan Spanish second division club Real Zaragoza a kaihruai a, season khat a enkawl chhung hian La Liga playoff a hruai thleng thei a ni. Pune City a enkawl hmaa a club hnuhnung ber Buriram United-ah hian Thai League Cup leh Mekong Club Championship nomawi a chawi hman.

Pune City CEO Gaurav Modwel chuan, "Ranko hi kum 15 chuang coaching tawnhriat lo nei tawh a ni a, hmun hrang hrang, a bik takin Asia-a a lo hlawhtlin tawhnate hian kan club a puih theih kan beisei a ni. Ranko hi rawlthar chher thiam tak a ni a, Pune-a hun kan hman dun chhung pawhin he game a hriatna hian min hneh em em a ni," a ti.

Popovic chuan, "Pune City ka zawm theih avangin ka lawm a, he club thil tum leh hmachhawpte ka hriat khan ka tan chuan hnar an harsa em em a ni," tiin a sawi.