Kan la champion lo - Toto Wolff
Mercedes team boss Toto Wolff chuan Formula 1 champion an la nih loh thu a sawi a, inthlahdah thei dinhmunah an la din loh thu a sawi chhuak bawk.
September 17 khan Singapore Grand Prix tlan niin Mercedes driver Lewis Hamilton chuan hnehna a chan laiin an elpui Ferrari driver pahnih Sebastian Vettel leh Kimi Raikkonen te erawh lap khatna lekah an chesual thung.
Britain driver Hamilton hian world championship-ah amah hnaih bertu Vettel aiin point 28 zetin hma a hruai fal tawh. Tun season-ah intlansiak hmabak paruk an la nei a, vawi khat hnehna chanah point 25 hmuh theih a nih avangin point hmuh theih 150 zet a la awm.
Mercedes hotupa Wolff chuan, "Singapore-a hnehna kan chan vang khan hawi sang thei ngawt kan la ni bik lo. Hmabak tam tak kan la nei a, hmahruaitu kan nihna hi vawng nung turin tha thlah a thiang lo," tiin a sawi.
Ferrari leh Mercedes te chu Formula 1 champion nih tumin an inel mek a, driver bakah team chungnung zawk nih an duh. Tunkar tawp hian Malaysia Grand Prix an tlan leh ang.