Zaninah Mizoram Police vs Chanmari West ; Police tum châkawm loh lai tak a ni - West Warrior coach
Mizoram Police-in coach thar Lalbiaksanga Colney hnuaiah zanin dar 7:30 hian an match hmasa ber an khel dawn a, an khingpui tur chu Chanmari West an ni.
Mizoram Premier League Season 6-ah Police-in point khat chiah an la hmu a, goal 18 an chhuah tawh bawk. Police goal chhuah zat hi MPL club dang pahnih goal chhuah zat belhkhawm ai pawhin a tam a; amaherawhchu West Warrior an hneh theih chuan an chung chiaha awm Ramhlun North point hmuh zat an hmu thei ang.
Point 3 duh
Chanmari West coach HC Zarzoliana chuan, "Chak kan mamawh a, chak kan duh a, chak kan tum ang. Semifinal khelh kan tum a nih chuan Police hi kan hneh a ṭul a ni. Amaherawhchu, Police hian coach thar an nei a, tum an châkawm loh lai tak a ni," tiin Vanglaini a hrilh.
West Warrior hian inhliam vangin captain Lalnunmawia an chhawr thei dawn lo a, forward H. Lallianzama'n training a zawm ṭhat hman loh avangin Zobawk tlangval hian inkhel bul a ṭan a rinawm loh bawk.
Police lamin tlarhnung lama an rinrawl ber Lalhmunmawia leh MFA Super Cup-a best goalkeeper Lalṭanpuia te chu inhliam vangin an inlan thei dawn lo. Coach thar BS-a Colney tan Police tlarhnung pawp sa tihphui chu hna hmasa tur a ni dawn a, West Warrior tlar hma dam kim lo mah se a hna hi a awlsam lo ang.
Armed Veng pa BS-a Colney chuan, "Harsatna chu eng pawh ni se keini chuan point hmuh kan mamawh a ni. Chanmari West laka theihna zawng zawng chhuah hi kan tihtur chu a ni a, kan rilru put hmang kan thlak a ṭul a ni. Police chuan minute 90 ṭha takin kan khel thei tur a ni," tiin result ṭha neih an tum thu a sawi ve bawk.
En châkawm
Chanmari West coach Zara hian vawi khat inkhelh chhuah zawhah point 10 tal hmuh a duh thu a sawi tawh a, tunah hian point thum bak a mamawh tawh lo. Season liam ta khan Zara hian a vawi khat nan Chanmari West hi MPL-ah semifinal a thlen pui a, mah se Bethlehem Vengthlang FC lakah an tlawm. Hemi ṭuma BVT enkawltu hi BS-a Colney hi a ni.
BS-a Colney hnuaiah Police hian training ṭum hnih chauh an nei hman a, amaherawhchu season liam ta khan MPL-ah tawnhriat a nei a, hei hian nasa takin a pui ang.
Police coach thar chuan, "A hniam ber aṭangin bul kan ṭan dawn a, mah se player-te hian theihna an nei a. Ka naute hi ka hre chiang a, kan rawn tho chhuak leh ang," tiin danglamna a thlen theih a beisei thu a sawi.
Police tan MPL3 top scorer Lalbiakhlua hian tun season-ah goal a la khung lo a, Keifang tlangval Biaktea ringawt pawh hi chakpui tham a nih avangin BS-a hnuaiah harhtharna chang se Police tan chanchin ṭha a ni thei ang.
Chanmari West lam tan zamna tur erawh a awm lo, team pahnih inkarah hian point ruk ngawt a awm a, Aizawl FC lakah 1-6 a chak lo Police lakah West Warrior-in point thum hmuh an tum hi a mak lo.