AFC tan Dinthar hneh a ṭul - Paulo

I League champion Aizawl FC-in an club history chhui letin Dinthar FC an ngam lo a, he record duhawm lo hi hre rengin Portuguese coach Paulo Menezes chuan Maimawms hneh chu an tan chona ṭha tak a nih thu a sawi.

Vawiin tlai dar 3:30 hian Lammualah Aizawl FC leh Dinthar FC te Lammualah an inkhel dawn a, he inkhel hian season tawpa semifinal khel tur thlenga a nghawng phak avangin inkhel pawimawh a ni.

I League club hian point ruk hmuin pangana an ni mek a, Dinthar FC hian point nga an hmu tawh thung.

Mizoram Premier Lea­gue-ah Aizawl FC leh Dinthar FC te hi vawi 10 an inkhel tawh a, I League club hi vawi khat chauh an la chak. Maimawms erawhin MPL-ah AFC hi vawi li an hneh tawh a, an intawn hnuhnung paliah tlawm an nei lo bawk.

Hei chauh hi a la ni lo, 2014 I Day Football final-ah Dinthar FC hian Aizawl FC hnehin nomawi an chawi tawh. An intawnna hnuhnung ber pawh I Day Football group stage niin Maimawms hian 2-1 in I League champion hi an hneh.

MPL1-a Dinthar FC champion-na kawnga pla­yer pawimawh KC Lal­chhuanmawia a inlan thei dawn a, College Veng tlang­val ke vei lama ball pet thiam hian coach H. Van­lalthlanga hnuaia Chanmari FC chak loh nei loa kaltluang chu freekick mawi takin a tihtawp sak a, inkhel bul a ṭan lo a nih pawhin Aizawl FC tan chuan helh tham a tling ang.

Aizawl FC pawh an phur vanglai tak a ni a, an match hnuhnung berah Mizoram Police 6-1 zetin an sawp. Portuguese coach Paulo chuan, "Aizawl FC hian Din­thar FC lakah record kan nei ṭha lo a, kan hneh a ṭul a ni. Dinthar FC laka point thum hmuh hi kan tan chona a ni a, kan inkhel tur hi a phurawm khawp mai," tiin MPL match satliah a nih loh thu a sawi.