Liverpool tan goal khung a harsa

Spartak Moscow goal zawnah vawi 16 ngawt pet mah se Liverpool goal khung zat chu goal khat a ni - Spartak khelmualah inkhel thunun chungin Reds-in an finishing tawih loh an tuar a, 1-1 in an inhnehtawk.

Champions League Group E inkhel dangah Sevilla chuan 3-0 ngawta NK Maribor an sawp avangin hmahruaitu an ni a, kum 2009 hnua Champions League-a khualmuala chak hmel la hmu lo Reds-in pahnihna dinhmun an luah mek - last 16 luh tum tan match hmasa pahniha chak zawh loh hi ngaihtuahna sen ngai tur a ni.

Fab Four

Liverpool boss Jurgen Klopp-a'n a vawi khat nan 'Fab Four' tia hminglem an pek Roberto Firmino, Mohamed Salah, Sadio Mane leh Philippe Coutinho-te inkhel bul a ṭantir a, inkhelh ṭan hma hauhin media hoin he 'chanchin' hi sawi nuam an ti a, Reds fans an hlim.

Mahse, Spartak khelmualah Reds fan-ten an duh ang an hmu lo a, goal khat leh point khat bak an hawn thei lo. Russian club hian minute 23-na lekah Fernando freekick hmangin hmahruaina goal an khung a, Reds-in si erawh an phur rei lo - Coutinho chuan minute riat hnuah an si phurh a sut nghal a, goal dang erawh a keng tel tawh bik lo.

Beisei phak lo

Spartak-in first half-ah Liverpool penalty area-ah vawi khat chiah ball an khawih fuh a, Reds erawhin hun pumin an inṭhelh siak thung! Daniel Sturridge-a'n hnai set sawt aṭangin a ṭhelh a, Firmino leh Mane-ten an hun ṭha neih Spartak goalkeeper Artem Rebrov chhaih buai nan an hmang thei lo bawk. Rebrov-a'n Salah hun ṭha neih a dansakna lamah hliam a tuar a, amah thlaktu Aleksandr Selikhove chu Egyptian forward hian a paltlang thei chuang lo - hun pek belha a chance neih ṭha zet chu dan sak a ni.

Liverpool boss Klopp chuan, "Goal khung kan zir a ngai a ni. Chance khati zozai nei chunga goal khat chauh khung kha han sawi dan vak pawh ka hre lo. Chance tam tak kan nei a, insawisel hi enge a hlawkna awm chuang ang? Kan theihna zawng zawng kan pe a, kan tumna kha chu a ropui a ni," a ti a, chak ngei tumin khel mah se an vanduai thu a sawi.

Buaina keeper?

Liverpool-in tun season-a goal an chhuahna kawngah an tlarhnungin dem rawn an hlawh ṭhin a, tun ṭuma an goal chhuahah erawh defender-te demna tur a awm lo - zawhna piang zawk chu Klopp-a'n a goalkeeper neih a thlak kual ṭhin hi a hlawkpui reng em? tih hi a ni.

Klopp-a'n an match hnuhnung pathumah keeper pathum a thlak - League Cup-a Leicester City an ngam loh ṭumin Danny Ward-a'n a veng a, Premier League-a Foxes an hnehnaah Simon Mignolet-a'n a veng a, Spartak laka vengtu chu Loris Karius a ni - German keeper hian Liverpool tan inelna hrang hrangah vawi 19 goal a veng a, goal chhuah loh a nei lo.