India-in U 20 World Cup thlen dil

All India Football Federation (AIFF) pre­sident Praful Patel chuan FIFA Under 20 World Cup thleng turin India chuan dilna an thehluh thu a sawi.

Praful Patel chuan, "FIFA U20 World Cup thlen hi kan dil a, Kolkata khawpuia FIFA Conference neih hunah FIFA hotute lo hmin kan tum dawn a ni," a ti.

FIFA Executive com­mittee chu October 26 leh 28 khian Kolkata khawpuiah an ṭhukhawm dawn a ni. India hian October 6 aṭanga khelh ṭan tur FIFA U17 World Cup an thleng dawn bawk a, Indian FA hotupa chuan he hun thleng tur hian an inpeih tawh thu a sawi.

FIFA U17 World Cup Local Organizing Committee (LOC) chairman ni bawk Praful chuan, "Under 17 World Cup thleng tur hian 100%-in kan inpeih tawh. Inelna hmachhawn turin kan naute pawh an inpeih tawh a, khawvelin Indian football a hmelhriat hun chu a thleng dawn ta," tiin a phur hle.

FIFA U17 World Cup hi October 6-ah khel ṭanin October 28-ah final khelh tur a ni dawn a, khawpui paruk Kolkata, Kochi, New Delhi, Mumbai, Guwahati leh Margao-ah te khelh a ni dawn a ni.