Real ropuina Ronaldo a lo kir

League match hnih chhung goal a khung loh hnuah Cris­tiano Ronaldo-a'n a Lalna ram Champions League-ah a theihna a pholang leh ta - Borussia Dort­mund lakah goal hnih a khung a, 3-1 in a team hi hnehna a chanpui.

Group H inkhel dangah Harry Kane theihna sanzia hmuh turin a awm leh ta - English striker hian an mikhualna ramah Apoel Nicosia lakah goal thum ngawt a khung a, 3-0 in Tottenham Hotspur chu hnehna a chanpui.

RonalGOAL

Signal Iduna Park-a inkhel­ah Real Madrid an tlangnel a, Bundesliga league match ruk an khelh tawha tlawm hmel la hmu lo team lakah La Liga-a beisei phak lo team an chungnung - inkhel ṭan aṭanga minute 18-na lekah Gareth Bale a inlar a, Welsh winger hian volley mawi zet hmangin hmahruaina goal a khung.

Minute 49-na a ni a, Ronaldo inlar hun a ni. Portuguese for­ward hian Bale-a hnen aṭanga a ball hmuh ṭha chu goal-ah a chantir. Dortmund tan Pierre-Emerick Aubameyang chuan an si phurh sut ṭhen mah se Real tan Ronaldo bawk a inlar chhunzawm a, hun tawp nan minute 11 chauh a awm tawh tihin Champions League-a a goal 109-na a khung a, Real an chak.

Zidane a hlim

Real manager Zinedine Zidane chuan, "Result duhthu­sam a ni. Inkhel bul kan ṭan

ṭha a, first half leh second half kan khelh danah ka lawm ve ve. Chawlhlawk hman zawh hnuah talbuai zeuh mah ila kan insiam-

ṭha thuai a ni. Bale leh Ronaldo ka lawmpui a, mah se kan hriatreng tur chu kan result hi ka vaia kan thawhhona rah a ni," a ti.

Spanish club tan goal khung lo zingah Sergio Ramos chu player langsar a ni. Real captain hian inkhel ṭantir lamah Maximilian Philipp ball pet chu a kutin a khawih fuh nia a lan avangin Real-in penalty an chawiah ngaih a ni a, mah se referee Bjorn Kuipers-a'n a hmu tlat lo. Spanish defender hian tauh goal theihna remchang vawi hnih ngawt a nei bawk a, mah se engmah lo maiah a chantir ve ve.

Kane 3-0 Apoel

Tottenham Hotspur-in Champions League match hnih an khelh tawhah hnehna an chang ve ve ta - Apoel Nicosia chu khualmualah 3-0 ngawtin an sawp a, minute 39-na lekah Kane-a'n goal hmasa ber a khung. Kane-a goal khung hmain Spurs thin phu a rang hman a, Cypriot club tan Igor de Camargo chuan bar a pet per!

Second half-a 1-0 a nih hnuah pawh Apoel an hlauh­awm a, Hugo Lloris-a'n save ropui vawi hnih zet a nei. Mahse, Spurs-in Kane an nei miau a, English striker hian minute 62-na leh 67-naah goal dang khung chhunzawmin a team hi hnehna a chanpui - Kane-a'n August-ah goal khung nei lo mah se September-ah ram leh club tan goal 11 a khung tling ta a, Champions League khelh mekah match hnih khelin goal nga a khung tling ta.

Pochettino thukhawchang

Tottenham manager Mau­ricio Pochettino chuan, "Game harsa tak a ni a, point thum kan hmuh theih avangin ka lawm a ni. Hnehna chan ngei mamawh chungin kan khel a, kan duh ang ngei result kan hlawh chhuak. He team tana regular taka khel phak ni lo zingah pawh khel ṭha tak tak an awm a, Harry Kane-a'n hattrick a siam lehzel te khan ka lawmna a belhchhah a ni," a ti.

Spurs hian hrem vangin Dele Alli leh Jan Vertonghen an chhawr thei lo a, damlohna avangin Christian Eriksen an hruai tel thei lo bawk. Mahse, an player pawimawh pathum tel lo pawhin Spurs an talbuai lo a, Dortmund leh Apoel an hneh tawh avangin October 17 zana Real Madrid an lenchilh hunah an inringtawk khawp ang.