Atletico-ah Costa a chiang ta

Diego Costa chuan Chelsea chhuahsanin Atletico Madrid a zawm fel ta. Kum 28 mi striker manah hian club pahnih hi kar hmasa khan an lo in be fel tawh a, Thawhṭanni khan medical paltlangin tihfel ngaite tihfel a ni.

Spain international striker hian Atletico zawm fel mah se Spanish club hi transfer chungchangah hrem mek an nih avangin nakkum January 1 thleng chu Costa hi a inlan thei dawn chuang lo.

Costa hian kum 2014 khan Atletico chhuahsanin Chelsea hi a zawm a, match 120 a khelhsakah goal 59 a khung. Premier League nomawi vawi hnih chawipuiin League Cup-ah vawi khat a champion pui bawk a, mah se nipui transfer bazar inhawn rual khan coach Antonio Conte chuan a striker hi Stamford Bridge-ah mamawh a nih tawh loh thu a hrilh a ni.

Chelsea boss Antonio Conte chuan, "A hmaa ka sawi fo ṭhin angin Diego chungah hian buaina ka nei lo. A hmalam hun lokal zel tur leh a hmabaka season awmah duhsakna ka hlan a ni," tiin a sawi.