Ni ruk chhunga match thum khel tur Arsenal Arsene Wenger-a naute Belarus-ah an zin
Arsenal chuan tun hnai ni ruk chhungin match thum an khelh a ngai dawn. Zanin dar 10:30 hian Europa League group stage khel turin Belarus club BATE Borisov an lenchilh ang. Arsene Wenger chuan tun hnai an fixture chu mangan thlak a tih thu a sawi chhuak.
Europa League Group H match dangah Cologne leh Crvena Zvezda an inkhel bawk ang. Gunners hian an match hmasa zawkah Bundesliga club Cologne hi 3-1 in an hneh tawh a, BATE leh Zvezda an inhnehtawk thung. Wenger-a neute hi table hmahruaitu niin zanin hian hnehna an chang leh thei a nih chuan an hmabak a awlsam tawh ang.
Match thum
Thawhṭanni zan Premier League inkhelah Arsenal hian Emirates Stadium-ah West Brom 2-0 in an hneh a, zanina BATE an hmachhawn hnu hian Pathianni zanah kaithar Brighton an mikhual zui leh nghal dawn a ni.
Gunners manager Wenger chuan, "Thawhṭanah kan inkhel a, zanina mkan inkhelh hnuah Pathianniah a ni leh nghal dawn. Tun dinhmuna kan fixtures hi chu a lungchhiat thlak deuh a ni. BATE hmachhawn tur team ka thlang fel tawh a, hnehna chan tumin kan inlan ang," tiin khualmualah hnehna chan a tum thu a sawi.
Wenger chuan sawi zawmin, "Kan inkhelh hun a zing lutuk hi chu ka sawisel hran lo. Chutihrualin club ṭhenkhat, inelna hmachhawn tam lo zawkte nena kan inhmachhawn dawn a nih chuan Thawhṭan zanah inkhelh hun hi siamrem theih chu a ni," tiin Ningani zana inkhel chunga Pathianni zana league match khelh zui leh nghal chu a zing lutuka a hriat thu a sawi.
League a pawimawh
Arsenal manager Arsene Wenger hian "Eng inelna pawh kan ngaipawimawh vek, a pawimawh ber erawh Premier League hi a ni," tiin a sawi tawh. French manager hian Cologne an hneh ṭum pawhin player langsar lo zawkte tan hmun a siamsak - zaninah pawh a kalphung pangngai a chhunzawm a rinawm hle.
League lama chhawr rim loh Jack Wilshere, Reiss Nelson leh Ainsley Maitland-Niles ten inkhel bul an ṭan thei tura ngaih a ni a, Cologne laka bench lama an ṭhuttir Reine-Adelaide leh Chuba Akpom te pawhin khelhna hmun an chang ve leh ang.
Nipui chawlh a neih rei vanga training nei tlem bik Alexis Sanchez chu league lamah chhawr turin a inpeih leh tawh avangin BATE lakah chawlh hahdamna hun pek a nih a rinawm. Hliam tenau neih vanga West Brom an hmachhawn ṭuma bench-a ṭhuttir Mesut Ozil pawh a dinhmun a la chiang lo bawk.
Belarus champion BATE hian European match bikah an khelmuala match an khelh hnuhnung pasarihah hneh loh an tawng lo a, Arsenal hi 3862km vela thui zin tur an nih avangin an hmabak a awlsam dawn lo. Tlarhma lamah Theo Walcott leh Olivier Giroud te an awm ang a, tlarhnung ho khawm turin captain Per Mertesacker a awm thei bawk ang - Petr Cech aiin David Ospina chuan khelhna hmun a chang ve leh zawk tura ngaih a ni.
Inkhel tur dang
Ronald Koeman-a'n nomawi chawi duhin transfer bazarah sum a hmang hnem a, beisei ang result a la nei hleithei lo. Everton hian an match hmasa zawkah Italian club Atalanta 3-0 in an hneh lo a, an chak loh hnuah Dutch manager hian "Harh a hun" tiin a naute a fuih. Zanin dar 12:15 hian Apollon an mikhual leh ang. Apollon hian an match hmasa zawkah Lyon 1-1 in an inhnehtawkpui thung a ni.
Chinese sumdang hausa kuta an luh hnuah AC Milan-in tum hma lama an ropuina ang neih let an tum, player 10 chuang lalutin team thar an din. Vincenzo Montella naute hi Sampdoria lakah 2-0 a tlawm hlim an ni a, tun season Serie A match bika an vawi hnih chak lohna a ni - European champion vawi sarih ni tawh hian zanin hian chak ngei an duh dawn.
Italian manager Montella chuan, "Kan chak loh chhanah hian tunge dem tur ber tih zawnchhuah hi hna pawimawh ber a ni lo. Tuna pawimawh zawk chu eng tiang chiahin nge hma lam kan pan theih ang tih hi a ni zawk," tiin a sawi.