Vawi thum chak zawn thei Villa

Aston Villa chuan a zawna vawi thum an chakna ni turin Burton chu Thawhlehni zan khan 4-0 ngawtin an sawp a, John Terry captain-na hnuai­ah hma an sawn ve zel. Season thara Premier League khelh ngei tuma insingsa mek Villa tan Keinan Davis, Albert Adomah, Robert Snodgrass leh substitute Josh Onomah te chuan goal khat ṭheuh an khung.

Villa tana goal khungtu zinga mi Robert Snodgrass hian thla hmasa khan West Ham aṭangin Villa hi loan-in a zawm a, a club thar tana a goal khung hmasak ber a ni. Hetihrual hian Albert Adomah a che ṭha takzet bawk a, Ghanaian winger hian a match hnuhnung pathumah goal li ngawt a khungna a ni ta bawk.

Aston Villa manager Steve Bruce chuan, "Ka naute inkhel kha hmuh a nuam takzet a, a bik takin khualmuala heti zata hnehna chan hi chu a hlimawm ṭhin a ni. Kan result avang hian inrintawkna kan neih belh zel ang a, player ṭha tak tak kan kawl nena ngaihtuah phei chuan kan hmabak a eng hle a ni," tiin Premier League khelh theih a inring hle.

Hetihlai hian season hman zawh taka Premier League aṭanga Championship lama tla Sunderland chu Championship lamah pawh eng ruai an ang thei lo - Ipswich Town khelmualah 5-2 ngawtin an tlawm a, league match 10 an khelh tawhah match riat zet chu an tlawm ta.