Zanin dar 8:00-ah boxing final

Tualchhung boxing inelna lian leh ropui ni ṭhin, kumin aṭanga professional boxing ni ta Tata Yodha 4x4 LPS Pro Fight 2022 chu zanin hian a hmawr bawk a ni dawn, zan dar 8:00 aṭangin final ṭan a ni ang.

R. Dengṭhuama Indoor Stadium, Mualpuiah neih a ni dawn a, ṭhutna ṭha chang duh tan kal hma a fuh ang, a hmuna en man hi Rs. 50 a ni. TV lamah chuan LPS kaltlanga en theih a ni bawk.

Mipui ngaihven hlawh zinga mi, super lightweight final khel tur Vanlalawmpuia (Awpa) chuan, "A hmunah ambulance leh doctor an awm dawn bawk a, a nih nih kan ni mai ang," tiin a sawi a, a khingpui tur leh ṭhianpa ni bawk a hlau lo hle.

Awpa hmachhawn tur HC Lalramfela a zam bik lo. Chawngtlai tlangval chuan, "Awp-a hneh ka châk avangin super lightweight-ah ka khel. Ka hmaa ding hrim hrim chu hneh vek ka duh," tiin a chhanglet - Khuangthing boxer nena an innuai hi a hmuhnawm dawn.

Pro Fight organising secretary Thangkhuma chuan, "Hripui leng vangin hun rei tak chhung infiamna buatsaih theih a ni lo a, tunah hun ṭha kan nei ve leh chiah. Kan boxer-ten an hun neih angah inbuatsaihna an nei ṭha.

"Mipui pawhin kan beisei ang ngeiin min hlutsak, final match zawng zawng a hmuhnawm vek ang," tiin Vanglaini a hrilh. Boxer 200 chuang inlan zinga a ṭha zual 10 chauh an dam tawh a, an tiatpui zinga mi bik an nih tawh avangin inhnek a hmuhnawm ang.

Lawmman Tur
Champion: Rs 50,000 + medal
Runner-up: Rs 20,000
GIG Motors Fighter of the Night: Rs 2,500
KT Enterprise Best Boxer: Washing Machine kg 8 + Trophy
KT Enterprise Best Challenger: Trophy + Rs 8,000
KT Enterprise Promising Boxer: Trophy + Rs 8,000
PC Lalnunmawia Trophy for Best Referee: Trophy + Rs 6,000
PC Lalnunmawia Trophy for Best Judge: Trophy + Rs 6,000