Vawiinah Zakhuma leh Dika inlan dawn

National Games of India 2022-ah vawiin hian Mizo weightlifter an inlan dawn. Mipa 61kg huangah Zakhuma, Ainawn Veng leh Lalzuidika, Muanna Veng te an inlan nghal dawn.

Inelna hi Mahatma Mandir, Exhibition Hall 1, V2, Gandhinagar-ah neih tur niin, Mizo infiammi te hian chawhnu lamah inelna an hmachhawn ang. Zin chhuak zinga mi Jacob Vanlaltluanga erawh vawiinah a la inlan dawn lo thung.

Mizoram weight-lifting coach Malsawma Khiangte chuan, "Kan naute hi medal la thei tur zinga mi an ni, chutih rualin an inel tawk hlawm hle a, chuvangin tihsual palh neih a hlauhawm khawp mai, beiseina erawh kan nei," tiin Vanglaini a hrilh.

Weightlifting-ah hian, lei aṭanga chawi char nghal tawp (snatch) leh, chawi kan hnua awma dah phawt a, chumi hnua char (clean & jerk) hmangin an inel ṭhin. Heng inelna pahnihah hian vawi thum ve ve an ti (attempt) thei a, chumi zinga a ṭha pahnih chu an belhkhawm ṭhin.

61 kg Category
1 Zakhuma Ainawn Veng, Pune ASI
2 Lalzuidika TNT (Muanna Veng), Pune, ASI

67 kg Category
3 Jacob Vanlaltluanga Ainawn veng, Pune ASI
Coach Malsawma Khiangte (SYS) Bethlehem Veng