National Games 2022 an ṭan

Nimin tlai khan 2022 National Games of India chu prime minister Narendra Modi-a'n a hawng a, opening ceremony-ah hian Mizoram contingent pawh an inlan - vawiin aṭangin inelna tak an hmachhawn chhunzawm nghal ang.

Inelna hi khelh hun a in ang dawn lo. Ruahman dan chuan–weightlifting, wrestling, athletics leh archery te chu vawiin aṭanga inelna hmachhawn tur an ni. Mahse, archery-ah hi chuan October 1, Inrinni aṭangin Mizo infiammite an inlan ṭan dawn chauh a ni.

National Games-ah hian Mizoram aṭangin infiammi mipa 16 leh hmeichhia 29, an vaiin 45 an tel; coaching staff nen Mizoram hminga feh chhuakte hi mi 60 an ni. Mizoram hi infiamna peng hrang pakuaah an inlan ang.

Mizoram Olympic Association (MOA) secretary general V. Lalzawmliana chu Mizoram Contingent Chef de Mission a ni a, Lalduhkima Sailo chu Dy Chef de Mission a ni thung.

Opening ceremony hi Chef de Mission leh Dy Chef de Mission bakah Football, Archery, Weightlifting, Athletics leh Wrestling aiawhten an chhim a; sorkar lam aṭangin Sports minister Robert Romawia Royte, Sports department secretary Lalrozama bakah MOA vice president Lallianṭhuama leh MOA joint secretary Joseph Thansanga te an tel.

National Games-ah hian India ram hmun hrang hrang aṭangin infiammi 7000 vel an kal khawm a, infiamna chi hrang 36-ah an inel ang. Khawpui paruk – Ahmedabad, Gandhinagar, Surat, Vadodara, Rajkot leh Bhavnagar-ahte October 10, Thawhṭanni thleng neih a ni ang.