School leh college tan football inelna

Reliance Foundation Youth Sports (RFYS) chuan, Mizorama school leh college hrang hrang tan football inelna a buatsaih dawn. October 25 aṭanga khelh ṭan tur a ni dawn a, tel tum tan October 1 thleng Mizoram Football Association Office-ah registration form lak theih a ni, entry fee a awm lo.

Inelna hi Zemabawk Field leh Ramhlun Sports Complex-ah khelh tur niin, a tirah chuan knockout a ni phawt ang. Kum 2017 aṭang khan inelna hi kalpui a ni tawh a, tun hma lama lo che ṭha tawh deuhte nen kumina che ṭhate league hmangin an inel chhunzawm ang.

Tournament tel tum tan hming ziah luh hma a fuh dawn, inziak lut hmasa 24 ten knockout round hi an khel dawn a ni. League a khel player-te tan hian scouting system ṭha zawk a kalpui tur niin, scouting camp neih tura ruahman a ni bawk.

Reliance Foundation hian youth sports angin football inelna an nei ṭhin. Anni hnuaiah tho Jr NBA hian Mizoram Basketball Association nen basketball camp an nei ṭhin bawk a, an hnuaia awm 'Young Champs' pawhin academy atan Aizawlah scouting camp an lo nei tawh ṭhin bawk.

Tournament hi tualchhunga tawp mai tur a ni lo. Mizoram champion hi state pawnah East Zone qualifier khel turin an zin ṭhin, kuminah pawh chutianga kalpui tur chu a ni ang.