Manchester derby hmachhawn tur Haaland a inpeih

Pathianni zan dar 6:30-ah Manchester United derby khelh a ni dawn a, mipui hmuh châk chu Erling Haaland-a'n Manchester United a hmachhawn tur hi a ni.

Kum 22 mi striker hian nipui transfer-ah khan pound maktaduai 51.2-in Etihad Stadium a pan a, insiamrem turin hun a mamawh dawn emaw tih laiin khawvela league hautak bera tam takin an ngaihah a tlangnel nghal hle.

Norwegian striker hian league match sarih a khelhah goal 11 a khung tawh a, inelna hrang hrangah match 10 khelin goal 14 a khung tawh - United hmachhawn turin Haaland a inpeih tih a chiang.

Season ṭan dawn khan Haaland hi Liverpool-in man to taka an lei Darwin Nunez nen khaikhin an ni - mahse, Haaland-a'n goal 14 a khung tawh laiin Nunez erawh match rukah goal hnih chiah a la khung a, an inthlau ta hle.

Record siamtu
Haaland hian Premier League-ah insiamrem turin hun a mamawh lo - a match hmasa pasarih aṭangin goal 11 a khung nghal a, December 1992-a Coventry City striker Mick Quinn-a record lo siam tawh chu a khum.

Premier League-a an match hmasa 10 aṭanga goal khung hnem ber record chu Quinn, Papiss Cisse leh Diego Costa ten an chelh reng ṭhin a, anni pathum hian goal 11 ṭheuh an khung - Haaland hian match thuma khel tlem chungin an record a rawn nihrual der tihna a ni!

Haaland hian Premier League-a a match hmasa panga aṭanga goal kua khungin hei pawh record a ni a, Premier League khelh a nih chinah August thlaa heti zat goal khung thei striker an la piang ngai lo.

Premier League-a khualmuala a match hmasa palia goal khung vek thei hmasa ber a ni. Crystal Palace leh Nottingham Forest laka hattrick a siam khan Premier League-a match zawna hattrick siam thei pasarihna a ni - Harry Kane chuan a zawna hattrick siam hi vawi hnih a nei.

Champions League pawh
Haaland-a'n Premier League-ah insiamrem turin hun a mamawh lo a, a tlangnel sana Champions League-ah phei chuan tal na tak a ni - City tana European club inelna sang bera a inlanna hmasa berah goal hnih a khung nghal a, 4-0 in Sevilla an ngam.

Norwegian striker hian RB Salzburg tana a CL match hmasa berah Genk hmachhawnin hattrick a siam a, Borussia Dortmund tan Paris St-Germain lakah goal hnih a khung bawk. Champions League-a club pathum tana a match hmasa bera goal khat aia tam ṭheuh khung thei hmasa ber a ni.

Haaland hian Champions League-a a match hmasa 20 aṭanga goal 25 khungin, match 20 aṭanga goal 16 khungtu Ruud van Nistelrooy leh Roberto Soldado record dinglai chu a khum a, Dortmund lama a khung chiah khan match 21-ah goal 26 a khung - CL-a goal 25 khung tling thei naupang ber ni turin Kylian Mbappe record a khum bawk.

Champions League-a match hmasa 30-a goal khung hnem ber record chu match kuaa match 30 a la khel tling lo chungin a nih rual der tawh a, Van Nistelrooy (21 goals) a khum ngei dawn niin a lang. CL-a goal 10, 15 & 20 khung tura match mamawh tlem ber a ni vek bawk!

Thawnthu hlui
Haaland hi a kalna apiangah record-in a zui emaw tih mai tur a ni a, Premier League-a pan hma hian a bua chhuah tham zet record a siam daih tawh - Dortmund tan Bundesliga, German Cup, Champions League leh German Super Cup-a a match hmasa berah goal a khung nghal vek a, hetiang ti thei Dortmund player an la awm lo.

Substitute bench aṭanga lut a, Bundesliga match hmasa ber khel zinga hattrick siam thei hmasa ber a ni a, Bundesliga-a a match hmasa pahnih (5 goals), pathum (7 goals), panga (8 goals) leh paruk (9 goals) a goal khung hnem ber record a siam bawk.

Bundesliga-a goal 50 khung tling turin match 50 chiah mamawh awmchhun a ni a, kum 20 leh ni 123 mi nia Hertha Berlin laka goal a khung khan Bundesliga match khata goal li khung tling thei naupang ber a ni nghal.

Kum 2019 khan FIFA Under-20 match-ah Honduras hmachhawnin goal kua a khung a, hei pawh record a la ni reng - Norway senior team tan match 23-ah goal 21 a khung der tawh!

Hmabak
Haaland hi record dang, tam tak siam thei dinhmunah a la ding mek - Premier League season khata goal khung hnem ber Andy Cole (1993-94) leh Alan Shearer (1994-95) te chuan goal 34 an khung a, mahse, khatihlai khan season khatah match 42 an la khel ṭhin.

He record khum tur hian Haaland hian match 31-ah goal 24 khung chiah a mamawh tawh - Premier League season khata match 38 khelh a nih hnua goal khung hnem ber chu Mohamed Salah a ni a, 2017-18 season khan Liverpool forward hian goal 32 a khung.

Lionel Messi chuan 2011-12 khan La Liga-ah goal 50 a khung a, European top five league-a season khata goal khung hnem ber record a ni - Haaland tan he record khum hi harsa tak angin lang mah se, tuna a goal khung dan aṭanga chhut chuan season khata goal 60 khung thei dinhmunah a ding mek.

Premier League-ah mahni match khelh zat emaw a aia tam goal khung chunga top scorer an la awm ngai lo - Kane chu tithei teuh ber niin, 2016-17 season khan match 30 a khelhah goal 29 ngawt a khung.

Beiseina
Haaland-a chet dan a ropui miau a, a chungah beiseina a sang lo thei lo - mahse, Champions League season khata goal khung hnem ber, 2013-14 season-a Cristiano Ronaldo-a'n match 11-a goal 17 a khung chu khum a har hret mai thei!

December 2013 khan Luis Suarez chuan league-ah goal 10 zet a khung a, August thlaa goal kua khungtu Haaland-a tan thla khata goal khung hnem ber ni turin hun a la tam tawk.

Premier League match hmasa 20 aṭanga goal khung hnem ber Kevin Phillips chuan goal 19 a khung a, match 30 aṭanga goal khung hnem ber Andy Cole chuan goal 28 a khung thung - Cole hi Premier League-a goal 30 khung tling tura match mamawh tlem ber a ni a, match 32 chiah a mamawh.

Jamie Vardy-a'n league match 11 chhung chu a zawnin goal a khung a, Haaland hian match nga chu a zawnin a khung ta - Shearer chuan 1995-96 season khan hattrick vawi nga a siam a, Haaland hian vawi hnih a siam der tawh!

A hun a thleng?
Premier League-a season hmasa bera goal khung hnem ber chu Fernando Torres niin, 2007-08 season khan Liverpool tan goal 24 a khung a, Haaland tan he record khum tur hian chance a sang hle.

Premier League match khata goal nga khung thei hi Cole, Shearer, Jermain Defoe, Dimitar Berbatov leh Sergio Aguero te an ni a, a chanchin kan sawi mek hi Haaland a nih miau avangin anni ho zingah a hming a ziak kai lo ang tih a sawi theih loh.

Champions League-ah goal 30 (34 matches) leh goal 35 (42) khung tura match mamawh tlem ber chu Van Nistelrooy a ni a, he record pawh hi tuna a khelh dan en chuan Haaland-a ban phakah a awm.

A tawi zawnga sawi chuan Haaland-a'n ropui taka City tana bul a ṭan avangin a hmaa record inchhawpten thlir an hlawh a, heng zawng zawng rilrua awm chungin United a hmachhawn dawn - Red Devils tlarhnung an muttui lo ṭan mai thei!