FIFA-in Chhetri an chawimawi

Football khawvela thuneitu sang ber FIFA chuan India captain Sunil Chhetri an chawimawi a, FIFA chuan Sunil Chhetri nun leh career chunchang tarlanna series, episode thum chu an tlangzarh thu an puang.

FIFA chuan an streaming platform FIFA+ ah Sunil Chhetri-a chanchin hi en theiha a awm thu an tarlang a, social media lamah Lionel Messi leh Cristiano Ronaldo te nena din tlar tirin an thlalak an pholang a ni.

Football khawvela thuneitu sang ber chuan, "Ronaldo leh Messi chanchin chu in hre vek a, tunah chuan international football la khel mek zinga goal khung tam pathumna chanchin hi inhriat ve a hun ta.

"Sunil Chhetri Ṭ Captain Fantastic chu FIFA+ ah en theihin a awm ta e," tiin an puang a, Chhetri chanchin hi FIFA+ ah hian a thlawnin a en theih a ni.

Kum 38 mi Chhetri hian India tan goal 84 zet a khung tawh a, ram tana la inlan mek zingah Cristiano Ronaldo (117) leh Lionel Messi (90) chu ram tana goal khung hnem lama a tluk loh an ni mek.

Hetihlai hian India prime minister Narendra Modi chuan Sunil Chhetri lawmpuina thu twitter-ah a tarlang ve bawk a, India PM chuan, "Sunil Chhetri, i ti ṭha takzet e - hei hian India rama football tihlarna kawngah nasa takin a pui ngei ang," a ti.

Chhetri hian Indian Super League club Bengaluru FC tan a khel mek a, a kum tam ve tawh mah se ram leh club tan player langsar a la ni reng thei.