Manchester derby khel thei lo tur Maguire

Mancheser United captain Harry Maguire chuan inhliam vangin Manchester derby a khel thei dawn lo. October 2, Pathianni zan dar 6:30 hian Manchester City-in Etihad Stadium-ah Manchester United hi an mikhual dawn.

Kum 29 mi Maguire hi England leh Germany 3-3 a an inhnehtawk ṭumin a khelh ṭhat tawk loh avangin sawisel a hlawh nasa a, inkhelh banah captain Harry Kane leh manager Gareth Southgate te chhan a ngai hial.

Inkhelh banah Southgate chuan, "John Stones khan a malpuiah hliam a nei a, Harry Maguire pawhin harsatna a tawk bawk," tiin a defender lai pahnihten hliam an neih thu a sawi a, derby-ah Stones leh Maguire te inlan lo thei dinhmunah an ding.

England captain Kane chuan, "Hun tawp lamah khan Maguire kha a inhliam a, a tawp lam minute 5-10 kha chu ke khing khat chauha khel ang a ni," tiin Maguire-a huaisenna chu a fak.

United hian Maguire chhawr thei lo mah se pawi an tih hranpa a rinawm lo a, a chhan chu manager Erik ten Hag-a'n club captain aiin Raphael Varane leh player thar Lisandro Martinez te a ring zawk.