Pulisic a hlauthawng lo

United States captain Christian Pulisic chuan tun hnaiah result ṭha nei lo mah se World Cup-ah ṭha taka an khelh theih a beisei thu a sawi.

USMNT hian tun ṭum international break-ah Japan 2-0 in an hneh lo a, Saudi Arabia nen goal awm loin an inhnehtawk. Chelsea player Pulisic chuan, "Ka hlauthawng lo. World Cup-ah chuan a bul aṭangin kan ṭan dawn a, theihtawp kan chhuah dawn. Result ṭha nei turin theihna kan neiin ka hria," tiin a sawi.

United States hi World Cup-ah England, Wales leh Iran te nen group khatah an awm ho a, November 21 zan hian an match hmasa berah Wales an hmachhawn ang.