Denmark-in Qatar duh lohna lantir dawn

World Cup khel tur Denmark chuan inelna thlengtu Qatar chet dan duh lohna lantir nan, an jersey rawngte chu an ti thim dawn a, an thawhpui, thawmhnaw siamtu Hummel chuan Denmark third kit chu a dum vekin an siam bawk - "Lusunna lantirna a ni," an ti.

Hummel hian anmahni logo ngei pawh lang chiang thei lo turin an duang a, "Mi sang tam takin an nunna an chan phahna inelnaah hian, langsar taka lo lan kan duh lo a ni," an ti a, Danish football team an thlawp thu an sawi bawk.

Denmark badge pawh tih thim a ni a, an jersey hak tur pui ber hi a sen niin, second kit erawh a var vek dawn - Denmark training kit sponsor lam pawhin an logo an tilang dawn lo a, Qatar dik lohna thuziak tarlanna atan an kian!

World Cup thleng tur Qatar hi an stadium saknaa an mi chhawrte ngaihsak tawk loah puh an ni a, mi tam takin an nunna an chan phah niin an sawi - hei erawh Qatar hian an pha ve tlat thung.

Qatar 2022 supreme committee chuan thuchhuah siam zuiin, "Danish Football Association (DBU) nen hian inbiakna langtlang leh ṭha tak kan nei a, stadium leh tournament project buaipuia hnathawkte hriselna leh himna, kan ngaihtuah em em dik lo taka tarlan a ni hi ṭha lo kan ti hle.

"He tournament hi mi tam takin dinchhuah nana an hman theih nan Qatari sorkar nen ṭha takin thawhhona kan nei a ni," an ti a, an puhna chu an pha nasa hle.

World Cup 2022 hi November 20-ah khelh ṭan tur a ni a, match hmasa ber hi zan dar 9:30-ah inelna thlengtu Qatar leh Ecuador ten an khel dawn a, December 18 zanah final khelh tur a ni ang.