Zanin dar 12-ah Bayern vs Leverkusen

Bayern Munich-in zanin dar 12:00 hian Allianz Arena-ah Bayer Leverkusen an mikhual dawn. Bundesliga champion lai Bavarians hian league-ah match nga chhung chak hmel an hmu tawh lo a, an match hnuhnung berah Augsburg 1-0 in an hneh lo.

Bayern-in result an neih ṭhat loh avangin manager Julian Nagelsmann-a dinhmun pawh a derthawng hiala sawi a ni a, Leverkusen nena an inkhel tur hi a pawimawh hle. Leverkusen pawhin season bul an ṭan ṭha bik lo a, match sarih an khelh tawh aṭangin point nga chauh an la hmuh avangin table-ah 15-naah an awm mek.

German champion hian nipui bazarah Robert Lewandowski an chân a, Polish striker tel loin inelna ṭantirh lamah goal khung pawp pawp mah se tunah erawh goal khung an harsat. Nagelsmann-a hote hi champion nawn tura rinkai la ni tho mah se panganaah an awm mek a, hmahruaitu Union Berlin chu point nga ngawtin an pha lo.

Bayern manager Nagelsmann tan Jamal Musiala chu chhhawr ngei a ṭul dawn a, Chelsea player hlui hian league-ah goal li a khung tawh bakah assist a nei tawh a, Germany tan pawh a che ṭha. Musiala hi tlarhmaa chiangah ngaih theih ta se, attacking-a awm tur player pathum dang erawh hriatthiam a har thung.

Goal thum khung tawh Sadio Mane, goal hnih leh assist vawi khat nei tawh Leroy Sane, goal khat leh assist vawi hnih nei tawh Thomas Muller, goal hnih leh assist vawi khat nei tawh Serge Gnabry te aṭangin player pathum thlan a ṭul dawn.

Leverkusen erawh season bul an ṭan ṭhat loh chhanah rawlthar duhawm Florian Wirtz inhliam vangah a puh theih a, season liam taa league-a goal 24 khungtu Patrik Schick chet ṭhat tawk loh vangah a ngaih theih bawk. Czech striker Schick hian tun season-ah goal hnih chiah a la khung.

Club pahnihin point thum an mamawh a, hun pawimawhah an player pawimawhte an chet ṭhat a ṭul ang. Tun hnaiah che ṭha tawk lo mah se Bayern hi club lian zawk an la ni tho a, Alianz Arena-ah an khelh dawn bawk avangin chak tura rinkai zawk an ni bawk ang.