Delph-a'n inkhelh a chawlhsan

England midfielder hlui Fabian Delph chuan inkhelh a chawlhsan thu a puang a, June thla khan Everton-a a contract neih lai chu hmang zoin, club nei tawh loin a awm zui a ni.

Delph hian Leeds United-ah a professional career zinkawng zawh ṭanin Aston Villa, Manchester City leh Everton tan a khel zui a, English club hrang hrang tan hian match 323 khela goal 19 khungin, assist vawi 12 a nei a ni.

England tana vawi 20 inlan hman Delph hian Manchester City tan Premier League nomawi vawi hnih a chawi hman a, Villa tan FA Cup leh League Cup final khel mah se nomawi chawi erawh a nei lo thung.

Delph hian July 2019 khan City aṭangin Everton chu pound maktaduai 8.5-in a zawm a, kum thum chhung atan contract ziakin, a man hi a khelh ṭhat dan a zira £10mtd thleng sang chho thei tur a ni.

Mahse, Villa aṭanga hming chhertu Delph-a'n hliam vangin Everton-ah match a khel tam tawk lo a, season thum chhungin inelna hrang hrangah match 41 chiah a khelhsak - kum 32 mi lek ni chungin inkhelh a chawlhsan ta hial.

Delph chuan, "He game mawi takin min pek zozai avang hian hlimna leh lawmna thu mai lo chu sawi tur ka nei lo. Ka chhung te, ka ṭhian te, ka khelhna club-a player leh staff-te chungah ka lawm.

"Club ropui tak taka ka khel thei kha vannei ka inti a, fan-te min thlawp ṭhinnaah ka lawm em em bawk a ni," tiin lawmthu a sawi a, football khawvel chu a mangṭha ta.