India an chak nuam sa

India chuan South Africa nen T20 match thum an khelh tura hmasa berah awlsam takin hnehna an chang. Nilaini zan inkhelah hian Men in Blue hi wicket riatin an chak a, ball 20 an dah bang bawk.

Greenfield Stadium, Trivandrum-ah India-in vawm hmasak an thlang. South Africa top order an che chhe hle. Quiton de Kock (1), captain Temba Bavuma (0), Rilee Rossouw (0), David Miller (0) leh Tristan Stubbs (0) te run siam zat belhkhawm chu run khat chauh a ni.

Amaherwhchu, Aiden Markram-a'n 25 runs a siam bakah Wayne Parnell (24) leh Keshav Maharaj (41) te an che ṭha a, over 20-ah 106/8 runs an tlin hram.

India opener KL Rahul a rawn che ṭha ve ta a, 51 runs a rawn siam. Captain Rohit Sharma (0) leh Virat Kohli (3) te khel chhe mah se Suryakumar Yadav (50) a rawn che ṭha a, over 16.4-ah 110/2 runs siamin hnehna an chang.

October 2, Pathianni hian match hnihna hi Barsapara Stadium, Guwahati-ah an khel ang a, match tawpna ber hi Holkar Stadium, Indore-ah October 4, Thawhlehni hian an khel ang.

Kum 2022 ICC Men's T20 World Cup hi October 16 aṭangin Australia-ah khelh a ni dawn a, India hian October 17-ah inelna thlengtu Australia an hmachhawn dawn. Hemi a nih avang hian tun ṭuma South Africa nen T20 match an khelh hi World Cup inpuahchah nan a pawimawh hle.