Zaninah MPL5 final rematch

Mizoram Premier League Season 6-ah zanin dar 7:30 hian Bethlehem Vengthlang FC leh Chanmari FC te an inkhel dawn a, anni pahnih hi season liam ta MPL final-a inhmachhawn te an ni.

MPL5 final-ah Chanmari FC-in BVT hi 3-0 in an hneh a, hemi ṭuma goal khungtu zingah Vanlalbiaa Chhangte chiahin jersey pawl a ha tawh a, team enkawltu coach pahnih pawh an dang tawh a, table chung lama awm pahnih inkhel hi a hmuhnawm khawp ang.

Chawnga hoin

Bethlehem Vengthlang FC coach Chawngthansanga'n hremna a hmang zo ta a, zanin hian technical area-ah a inlan leh thei tawh ang.

Chawnga hian Chanmari West a enkawl laiin H. Vanlalthlanga hnuaia vawi 15 chak zawn tawh Chanmari FC record chu tihtawp sakin MPL2 match hmasa berah an inhnehtawk.

BVT hi Ramhlun North hneh zo hlim an ni a, Chanmari lam hi Chhinga Veng hneh lo zo chiah an ni thung a, Chawnga a rawn let bawk avangin Bethlehem Vengthlang mipuiin beiseina sang tak nen Lammual an pan thei ang.

Striker bil

Chanmari FC striker Alex Whittemore-a'n goal a la khung lo a, Liberian forward hian thawm nei lian mah se goal hmaah a thiamna a la lantir thei lo.

Alex-a kawppui Jakob Van­lal­hlim­puia'n MPL match hmasa berah Dinthar FC lakah chakna goal a khung a, hemi match-ah hian red card hmu zuiin match hnih hrem a nih hnuah goal a la khung leh lo. Hnahthial rawlthar Jakob hian theihna sang tak a nei a, a tlan chak bakah a len ṭhat bawk avangin defender tan hnawksak mah se goal tam zawk khung turin a rilru a huaisen a ṭul ang.

Bethlehem Vengthlang lam an danglam lo a, position-a an buaina ber chu tlarhmaa ding tur striker lian ṭha (target man) a ni. Amaherawhchu BVT leh Chanmari te hi mual sir lamah an hlauhawm thung. Chanmari coach Thlanga hian mual sirah Mabiaa Chhangte, Ṭhasiama leh Lalmuanzova te an nei a, BVT lam pawhin winger an nei ṭha, Sihphir tlangval Laldinliana Varte-in goal hnih a khung tawh.

Mipui tam

Chanmari FC-in hnehna an chang a nih chuan semifinal an hnaih dawn a, an result neih ṭhat avangin mipui pawhin an ṭawiawm ṭha. MPL5 final rematch-ah Chanmari mipui hi tam tur zawka ngaih a ni.

Chutihrualin Chawngthan­sanga hi a awmna apiangah vengchhung mipui lawm a hlawh a, BVT hian squad an neih ṭhat bawk avangin khelmual chhung leh pawnah Chanmari an elpha ang.